Innlent | mbl | 15.2.2018 | 14:36 | Uppfært 16:00

Gat tekið smálán út á kennitölu vinar

Maðurinn ætlaði að gera kunningja sínum greiða en endaði á því að taka smálán. mbl.is/Júlíus

Neytendasamtökin hafa fengið inn á borð til sín mál þar sem maður ætlaði að gera kunningja sínum greiða með því að leyfa honum að leggja inn á sig pening, sem hann myndi svo millifæra áfram á annan reikning. Á einhvern óskiljanlegan hátt endaði maðurinn hins vegar á að taka smálán. Hafði þá kunninginn getað tekið smálán í hans nafni og látið leggja peninginn inn á hann. Málið er nú einnig komið inn á borð til lögreglu. Þetta kemur fram í frétt á heimasíðu Neytendasamtakanna.

Málavextir voru þannig að maðurinn fékk skilaboð seint um nótt þar sem gamall kunningi sagðist vera í vandræðum. Kunninginn segist vera í útlöndum og biði eftir millifærslu frá kærustunni en vegna einhverra tæknivandamála bærist millifærslan ekki. Hann spyr því hvort kærastan megi millifæra 100.000 krónur á manninn sem hann síðan millifæri á kunningjann. Maðurinn var heldur tregur til en samþykkti að lokum og gefur upp kennitölu og reikningsnúmer. Smálánið birtist síðan inni á heimabanka einstaklingsins án skýringar í nokkrum færslum og millifærði maðurinn strax fjárhæðina á kunningjann. Það var síðan daginn eftir sem heimabanki þessa einstaklings fylltist af greiðsluseðlum frá öllum fimm smálánafyrirtækjunum sem starfa hér á landi og honum varð ljóst að þessi gamli kunningi hans hafi tekið smálán í hans nafni og platað hann til þess að millifæra andvirði þess yfir á sig.

Frétt af mbl.is

Smálán eru vaxandi vandamál

Á heimasíðu samtakanna segir að umrætt mál sé nú lögreglumál. „Það er algerlega óásættanlegt að hægt sé að taka smálán í nafni annars aðila og það með einungis kennitölu og reikningsnúmer að vopni. Umræddur einstaklingur samþykkti aldrei skilmála fyrirtækisins og fyrirtækið hafði ekki fyrir því að ganga úr skugga um að réttur einstaklingur væri að taka lánið, t.d. með rafrænum skilríkjum eða annarri aðferð. Vandséð er því að hægt sé að krefjast greiðslu frá þessum aðila, sem raunverulega tók aldrei lán heldur einungis millifærði andvirði þess áfram – grunlaus um svikin sem hann hafði orðið fyrir.“

Neytendasamtökin hafa sent erindi á stjórnvöld og krafist þess að böndum verði komið á starfsemi smálánafyrirtækja hið fyrsta. Ítrekað hafi verið staðfest að fyrirtækin brjóti lög um neytendalán og ljóst er að þau úrræði sem eru fyrir hendi virka ekki. „Það er með öllu ólíðandi að fyrirtæki sem dæmd hafa verið fyrir lögbrot og sektuð vegna þeirra skuli halda áfram eins og ekkert hafi í skorist.“