Knattspyrnusamband Íslands hefur sent fyrirspurn til Alþjóðaknattspyrnusambandsins, FIFA, um hvers vegna ekki verður hægt að kaupa miða á leik Íslands og Argentínu í miðasöluglugganum sem opnar í fyrramálið vegna HM í Rússlandi í sumar.
„Við vitum að það var mikil eftirspurn í Argentínu vegna leiksins,“ segir Klara Bjartmarz, framkvæmdastjóri KSÍ, en bætir við að knattspyrnusambandið viti ekki hversu margir miðar voru seldir í miðasöluglugganum í fyrra á leiki Argentínu í keppninni.
Hún segir óljóst hvort selst hafi fleiri miðar á leik Íslands og Argentínu heldur en aðra leiki.
„Við vitum að þetta er ekki stærsti völlurinn í keppninni og mögulega eru leikir sem fara fram í Moskvu ásetnari en aðrir leikir, þannig að það er hugsanlegt að það hafi verið seldir fleiri miðar á þennan leik fyrir fram áður en kom í ljós hvaða lið voru þarna.“
Guðni Bergsson, formaður KSÍ, greindi frá því í byrjun mars að leikur Íslands og Argentínu sé meðal þeirra sem hvað mest spurn er eftir miðum á af öllum leikjum keppninnar.