Opnað hefur verið fyrir rafrænar ábendingar til Barnaverndar á tilkynningasíðu sem sett hefur verið upp á vef Reykjavíkurborgar. Segir í fréttatilkynningu frá Reykjavíkurborg að á síðunni sé hægt að velja rafrænan ábendingahnapp eftir eðli mála.

Þannig sé hægt að senda tilkynningar til Barnaverndar þegar ástæða þykir til að ætla að barn búi við óviðunandi uppeldisaðstæður, verði fyrir áreitni, ofbeldi eða að barnið stofni heilsu sinni og þroska í alvarlega hættu.

Annar hnappur á síðunni er síðan vegna tilkynninga ef ástæða er til að ætla að atferli starfsfólks, sem starfa sinna vegna hefur samskipti við börn, sé stórlega ábótavant.

Þriðji og síðasti hnappurinn á síðunni leiðir fólk síðan yfir á sambærilega síðu á ensku og pólsku.

Er síðan hluti af aðgerðaáætlun velferðarsviðs Reykjavíkurborgar um barnaverndarúrræði og aðra þjónustu við börn í kjölfar máls sem upp kom vegna starfsmanns, sem starfaði með börnum.

Áfram er þó einnig hægt að tilkynna til Barnaverndar Reykjavíkur í síma 411 1111 og í 112 í neyðartilvikum eftir lokun og einnig er hægt að senda á netfangið, barnavernd@reykjavik.is

Tengdar fréttir

Stuðningsfulltrúi ákærður fyrir kynferðisbrot

Hafnar málskotsbeiðni stuðningsfulltrúans

• Fórnarlamb stuðningsfulltrúa fer fram á miskabætur
• Stuðningsfulltrúinn í fimm ára fangelsi
• Stuðningsfulltrúinn snýr ekki aftur
• Síðasta kæran felld niður

» Fleiri tengdar fréttir

• Blogga um frétt