Innlent | mbl | 11.5.2018 | 9:09 | Uppfært 9:48

„Geta ekki firrt sig ábyrgð“

Slökkviliðið að störfum í Miðhrauni í byrjun síðasta mánaðar. mbl.is/Eggert

„Lögmaðurinn sem við erum með, Guðni [Á. Haraldsson] hjá Löggarði tjáði sig um ábyrgð Geymslna og þá fór boltinn að rúlla af stað,“ segir Ágúst Valsson um hópmálsókn sem er í undirbúningi vegna eldsvoðans í Miðhrauni í apríl.

Frétt af mbl.is

Undirbúa hópmálsókn vegna brunans

Í framhaldinu var haldinn fundur með Guðna og ákveðið að fara með málið lengra, en lögmaðurinn hafði tjáð sig um málið í fjölmiðlum.

„Við teljum að Geymslur beri þarna ábyrgð samkvæmt lögum um þjónustukaup. Þau geta ekki firrt sig ábyrgð á þeim lögum,“ segir Ágúst, sem er einn þeirra sem missti eigur í brunanum.

Um 200 manns misstu sitt

Spurður hversu margir taki þátt í málsókninni nefnir hann að 250 geymslur hafi verið í húsnæði Geymslna og að einhverjir hafi verið með tvær geymslur. „Það eru sirka tvö hundruð manns sem hafa misst sitt í þessum bruna en einhverjir náðu að bjarga sínu á fyrstu hæðinni og urðu fyrir minni skaða. Við ætlum að reyna að fá sem flesta á fundinn. Þar verður rætt hvaða möguleika við höfum og við ætlum að leyfa öllum að bera fram spurningar til lögmanna.“

Þar á Ágúst við fund sem er fyrirhugaður næstkomandi mánudag á 2. hæð Ásvallalaugar í Hafnarfirði klukkan 20 fyrir þá sem eiga kröfur í málinu.

mbl.is/Ásdís

Þrjú mál

Að sögn Ágústs verða málin þrjú talsins, eða fyrir þá sem voru með öllu ótryggðir, fyrir þá sem voru með 15% heimilistryggingu og þá sem voru fulltryggðir.

Hann bætir við að viðskiptaskilmálar hjá Geymslum hafi kveðið á um að um húsaleigusamning hafi verið að ræða en ekki þjónustusamning. Þetta segir hann óeðlilegt.