Nokkuð hefur verið um að fólk hafi sett sig í samband við lögreglu vegna banaslyssins sem varð á Vesturlandsvegi á mánudagskvöldið. Þetta staðfestir Kristján Ólafur Guðnason, stöðvarstjóri hjá lögreglunni í Grafarholti.
Lögregla biðlaði í gær til þeirra sem kunni að hafa orðið vitni að árekstrinum eða aðdraganda hans að hafa samband.
Einn maður lést og níu slösuðust, þar af fjórir alvarlega, þegar tveir bílar lentu í árekstri. tveir þeirra sem slösuðust eru enn á gjörgæsludeild. Átta börn eru meðal þeirra sem slösuðust.
„Það er búið að ræða við flesta þá sem hafa verið í sambandi við okkur,“ segir Kristján. Hann ítrekar þó að lögregla vilji enn heyra í þeim sem kunni að hafa orðið vitni að árekstrinum eða aðdraganda hans.
„Allar upplýsingar sem við fáum hjálpa,“ segir hann og játar því til að þær aðstoði við að byggja upp mynd af atburðarásinni, en rannsókn á tildrögum slyssins stendur enn yfir hjá lögreglu og rannsóknarnefnd samgönguslysa.