Alþjóðlega bílaleiguvefsíðan Auto Europe, sem er með bækistöðvar í Portland í Bandaríkjunum, er hætt viðskiptum við íslensku bílaleiguna Procar. Sú ákvörðun var tekin í dag, að sögn forstjóra fyrirtækisins, Imad Khalidi, sem svaraði fyrirspurn mbl.is í kvöld.

Samkvæmt heimildamanni mbl.is, sem starfaði áður hjá Procar og vill ekki láta nafns síns getið, hefur Auto Europe verið mikilvægasti samstarfsaðili Procar og veigameiri en nokkur annar milliliður í því að skaffa bílaleigunni viðskipti erlendra ferðamanna, en Auto Europe er í samstarfi við bílaleigur á yfir 20.000 stöðum í heiminum. 

„Við ákváðum að hætta að senda þeim viðskipti viðskiptavina okkar í dag,“ segir Khalidi í skriflegu svari sínu, en blaðamaður spurði einnig að því hvort Auto Europe ætlaði að endurskoða staðfestar bókanir Procar og láta viðskiptavini sína vita af stöðu bílaleigunnar. Sú er raunin.

„Við munum láta viðskiptavini okkar vita og færa þá í viðskipti hjá Avis sem er okkar alvörusamstarfsaðili,“ segir Khalidi og bætir við að lokum: „Þeir eru óheiðarlegir.“

Tengdar fréttir

Bílaleigan Procar

12 mánaða skilorðsbundið fangelsi í Procar-máli

• Játaði brot sín skýlaust í Procar-máli
• Yfir 86% þegar búnir að semja vegna Procar-máls
• Ákærður í Procar-málinu
• Procar fær ekki sex bíla frá Bílabúð Benna

» Fleiri tengdar fréttir

• 1 blogg um fréttina

Bloggað um fréttina

• Ómar Ragnarsson: Slæmt fyrir ferðaþjónustuna almennt.