Innlent | mbl | 11.3.2019 | 16:30

Ekki greinst ný tilfelli mislinga

Heilbrigðisráðuneytið. Ljósmynd/Aðsend

Fjöldi dauðsfalla af völdum mislinga á heimsvísu dróst saman um 80% milli áranna 2000 og 2017 vegna aukinnar áherslu á bólusetningu, en talið er að bólusetning fyrir mislingum hafi komið í veg fyrir 21,1 milljón dauðsfalla á umræddu tímabili.

Þetta kemur fram á vef heilbrigðisráðuneytisins þar sem birtar eru staðreyndir um mislinga og bólusetningu við þeim sem Alþjóðaheilbrigðismálastofnunin (WHO) hefur tekið saman. Stofnunin segi bólusetningu við mislingum með ábatasömustu fjárfestingum til að efla lýðheilsu, en bóluefni við sjúkdómnum var fyrst kynnt 1963.

Fram komi í samantekt WHO að fyrir 1963 og áður en farið hafi verið að bólusetja fyrir mislingum í ríkum mæli hafi alvarlegir mislingafaraldrar brotist út á tveggja til þriggja ára fresti og valdið um 2,6 milljónum dauðsfalla á hverju ári.

Sífellt fleiri börn bólusett við mislingum

„Þrátt fyrir að bóluefni við mislingum sé bæði öruggt og ódýrt drógu mislingar yfir 110.000 manns til dauða í heiminum árið 2017, að stærstum hluta börn yngri en fimm ára. Árið 2000 fengu um það bil 72% barna í heiminum bólusetningu við mislingum við eins árs aldur en árið 2017 var hlutfallið komið í 85%,“ segir ennfremur á vef ráðuneytisins.

WHO hvetji þjóðir til að halda vöku sinni til að sporna við útbreiðslu mislinga og standa vörð um þann árangur sem náðst hafi með stöðugri árvekni og markvissum aðgerðum. Þá segir að embætti landlæknis hafi tekið saman spurningar og svör um mislinga og birt á vef sínum www.landlaeknir.is. Þar séu einnig birtar tilkynningar um stöðu mála eftir því sem efni standa til í kjölfar þess að mislingar greindust hér á landi nýlega.

Ennfremur segir á vef landlæknis að á samráðsfundi sóttvarnaryfirvalda í morgun hafi komið fram að ekki hafi greinst ný tilfelli mislinga.