Innlent | mbl | 8.11.2019 | 9:56 | Uppfært 14:21

„Blöskrar sem borgara“

Salvöru Gullbrá Þórarinsdóttur blöskrar brottvísun óléttrar albanskrar konu úr landi. Ljósmynd/Aðsend

„Manni blöskrar sem borgara að sjá þessa meðferð á fólki, óháð því hvort það átti að fara eða ekki, að vísa úr landi óléttri konu sem er komin svona langt á leið með lítið barn. Það verður að passa að þetta komi ekki fyrir aftur,“ segir Salvör Gullbrá Þórarinsdóttir, sem stendur fyrir mótmælum í dag kl. 15 við dómsmálaráðuneytið þar sem brottvísun óléttu albönsku konunnar er mótmælt. Óléttar konur og mæður eru hvattar til að mæta en allir aðrir eru einnig velkomnir.

Salvör bendir á að heilsa konunnar og mannúð í garð fjölskyldunnar eigi að „trompa allt annað“. Hún furðar sig á að enginn hafi hreinlega komið í veg fyrir að kona gengin tæpar 36 vikur á leið með annað barnið sitt hafi verið flutt nauðug úr landi. Fyrir höndum átti hún um 20 klukkustunda langt ferðalag með þremur flugleggjum á leið aftur til Albaníu.

Salvör segir að ekkert í viðbrögðum frá dómsmálaráðherra og forstjóra Útlendingastofnunar beri merki um að þetta geti ekki endurtekið sig. „Ég hef áhyggjur af þessum vinnubrögðum að heilsa fólks sé lögð að veði til að framfylgja ákveðnum lögum,“ segir hún.

Ástæðan fyrir því að óléttar konur eru sérstaklega hvattar til að sýna samstöðu og mótmæla er að sýna fram á hvers konar einstaklingur verið er að senda úr landi. Salvör sjálf er gengin um 22 vikur á leið. Hún er vongóð um að fólk mæti og sýni hug sinn í verki.

Ófrískar konur og mæður með ung börn ætla að mæta í Dómsmálaráðuneytið á Sölvhólsgötu á morgun, föstudag, kl.15 og mótmæla þeirri ómannúðlegu meðferð á fólki sem varð til þess að ófrískri konu og tveggja ára barni hennar var vísað úr landi á aðfaranótt þriðjudags!
— salka gullbrá (@salkagullbra) November 7, 2019