Mjög kalt er á landinu og mesta frostið í nótt mældist á Sandskeiði 15,2 stig. Í nótt og fyrramálið gæti 20 stiga frost eða meira mælst á einhverjum stöðum. Spár fyrir illviðri föstudagsins eru lítið breyttar og verða smám saman líklegri til að rætast eftir því sem nær dregur.

Frétt af mbl.is

Icelandair býr sig undir lægð föstudagsins

„Nú er kalt á landinu og mest frost í nótt mældist 16,4 stig á Sandskeiði, 15,2 stig á Húsafelli, 14,1 stig á Grímsstöðum á Fjöllum og 13,7 stig í Víðidal við reiðvöll Hestamannafélagsins Fáks.

Í dag er útlit fyrir norðlæga átt og vindhraði yfirleitt innan við 10 m/s. Það má búast við dálitlum éljum á norðanverðu landinu og einnig eru stöku él á sveimi við suðurströndina. Annars staðar á landinu er ekki útlit fyrir úrkomu. Það herðir enn á frosti í kvöld. Í nótt og fyrramálið gæti 20 stiga frost eða meira mælst á einhverjum stöðum, líklegast er að það gerist inn til landsins þar sem lægðir eru í landslagi. Seint á morgun fer síðan að hvessa úr austri.

Þegar þetta er skrifað snemma á miðvikudagsmorgni er lægðin sem á að valda óveðrinu stödd suðvestur af Nýfundnalandi og er skýjakerfi hennar greinilegt á gervitunglamyndum. Óveðurslægðin fer til austurs út á Atlantshaf í dag og dýpkar ört, en á morgun tekur hún stefnu til norðurs og nálgast okkur. Búist er við að óveðrið hafi náð hámarki á Íslandi á föstudagsmorgun. Viðvaranir vegna veðursins verða uppfærðar í dag eftir því sem nýjar og nákvæmari spár berast,“ segir í hugleiðingum veðurfræðings Veðurstofu Íslands.

Vindaspá fyrir föstudaginn. Kort/Veðurstofa Íslands

Frétt af mbl.is

„Óveður af verri gerðinni“ nálgast

Gul viðvörun hefur verið gefin út fyrir allt landið frá því klukkan þrjú aðfaranótt föstudags til klukkan 21 á föstudagskvöldið. „Spár gera ráð fyrir að sérlega djúp lægð nálgist landið úr suðvestri (þrýstingi í lægðarmiðju er spáð niður í 930 hPa).

Búast má við austlægum stormi, roki eða ofsaveðri, hvassast sunnan til á landinu framan af degi. Víða snjókoma eða slydda, úrkomumest sunnan- og austanlands. Hlýnandi veður, rigning á láglendi um landið sunnanvert og við austurströndina síðdegis með hita 1 til 5 stig, en vægt frost fyrir norðan. Talsvert hægari vindur á landinu um kvöldið.

Víðtækar samgöngutruflanir eru líklegar, ekkert ferðveður er á meðan viðvörunin er í gildi. Líkur eru á foktjóni, sér í lagi sunnan til á landinu. Fólki er bent á að sýna varkárni til að fyrirbyggja slys og festa lausamuni eins og frekast er kostur. Einnig má búast við hárri sjávarstöðu vegna áhlaðanda.“

Veðurspáin fyrir næstu daga

Norðlæg átt 3-10 m/s. Dálítil él norðanlands og stöku él við suðausturströndina, en bjart með köflum á suðvestanverðu landinu. Frost 3 til 13 stig í dag og herðir á frosti í nótt.
Vaxandi austlæg átt á Suður- og Vesturlandi síðdegis á morgun, þykknar upp með éljum við ströndina og dregur úr frosti.

Á fimmtudag:

Norðlæg eða breytileg átt 3-10 m/s og víða léttskýjað, en stöku él við norðurströndina. Frost 6 til 20 stig, kaldast í innsveitum. Vaxandi suðaustanátt suðvestan til á landinu síðdegis, þykknar upp með éljum við ströndina og dregur úr frosti.

Á föstudag:
Austanstormur, rok eða ofsaveður, hvassast sunnan til á landinu framan af degi. Víða slydda eða snjókoma, úrkomumest sunnan- og austanlands. Hlýnandi veður, rigning á láglendi um landið sunnanvert og við austurströndina undir kvöld með hita 1 til 5 stig, en vægt frost fyrir norðan. Talsvert hægari vindur víðast hvar á landinu um kvöldið.

Á laugardag:
Gengur í allhvassa eða hvassa austanátt með rigningu eða slyddu, einkum sunnan og austan til á landinu. Hiti 1 til 6 stig síðdegis.

Á sunnudag:
Norðaustlæg átt með rigningu eða slyddu norðan- og austanlands og snjókomu um kvöldið. Úrkomulítið sunnan heiða. Heldur kólnandi.

Á mánudag:
Norðanátt og snjókoma eða él á Norður- og Austurlandi, en bjartviðri um landið sunnan- og vestanvert. Víða vægt frost.

Á þriðjudag:
Suðvestlæg átt með dálitlum éljum, en léttskýjað fyrir norðan og austan. Hiti breytist lítið.

Veður á mbl.is