Landsréttur staðfesti í dag frávísun Héraðsdóms Vestfjarða á dómsmáli hluta landeigenda Drangavíkur á Ströndum á hendur VesturVerki ehf. og Árneshreppi.

Landeigendur höfðuðu mál gegn Vesturverki og Árneshreppi í lok sumars 2019 og kröfðust þess að framkvæmdaleyfi Vesturverks, fyrir framkvæmdum á Ófeigsfjarðarheiði vegna Hvalárvirkjunar, yrði fellt úr gildi sem og deiliskipulag vegna framkvæmdanna.

Héraðsdómur vísaði málinu frá 9. janúar og taldi ósannað að eigendur Drangavíkur ættu það land sem framkvæmdirnar varðar. Var frávísun Héraðsdóms kærð til Landsréttar.

Landsréttur telur sömuleiðis ósannað að eigendur Drangavíkur eigi það land sem framkvæmdirnar varða. Landeigendur hafi heldur ekki sýnt fram á röskun hagsmuna á grundvelli grenndar- eða nábýlisréttar. Að auki veiti hinar kærðu stjórnsýsluákvarðanir eingöngu heimild til að ráðast í óverulegar framkvæmdir sem ekki muni hafa varanleg áhrif. Landeigendur geti heldur ekki byggt réttindi sín á áhrifum framkvæmda á óbyggð víðerni og þeir hafi því ekki sýnt nægilega fram á að þeir eigi lögvarða hagsmuni af málinu.

Dómurinn dæmdi landeigendur til þess að greiða Árneshreppi og Vesturverki kr. 500.000, hvorum fyrir sig, í málskostnað.

Frétt af mbl.is

Dómsmáli landeigenda gegn Vesturverki vísað frá

Tengdar fréttir

Árneshreppur

Neitaði ekki að skrifa undir friðlýsinguna

• Virkjað verður í Hvalá „á öðrum hraða“
• Framkvæmdaleyfi vegna Hvalárvirkjunar fallið úr gildi
• Öll verkefni Vesturverks á ís
• Landamerkjamál gæti sett Hvalárvirkjun í uppnám

» Fleiri tengdar fréttir

• Blogga um frétt