Innlent | mbl | 28.5.2020 | 18:29 | Uppfært 29.5.2020 6:34

„Hörmulegt og óskaplega sorglegt“

Fjöldahjálparstöð var opnuð í Hrísey eftir eldsvoðann í morgun. Bæjarstjóri og forseti bæjarstjórnar á Akureyri heimsóttu íbúa um hádegi í dag. Ljósmynd/Ásthildur Sturludóttir

„Þetta er hörmulegt og óskaplega sorglegt að sjá þennan stærsta vinnustað í eyjunni farinn, það er bara þannig,“ segir Ásthildur Sturludóttir, bæjarstjóri á Akureyri, í samtali við mbl.is. Hún sigldi til Hríseyjar í hádeginu ásamt Höllu Björk Reynisdóttur, forseta bæjarstjórnar, til að kynna sér aðstæður og ræða við íbúa eftir brunann í gamla frystihúsinu í morgun.

Frétt af mbl.is

„Þetta er allt ónýtt“

Ásthildur og Halla ræddu við slökkviliðsstjórann og eigendur Hrísey Seafood, sem eru með fiskvinnslu í húsinu, auk þess sem þær hittu íbúa í fjöldahjálparstöð sem opnuð var í eyjunni í kjölfar brunans en rýma þurfti stóran hluta eyjunnar um tíma vegna óhagstæðrar vindáttar.

Eldur kviknaði í frystihúsi fiskvinnslunnar Hrísey Seafood í morgun. Tíu manns vinna í vinnslunni sem er stærsti vinnustaðurinn á eyjunni. Ljósmynd/Ásthildur Sturludóttir

„Íbúar og eigendur fyrirtækisins eru í áfalli yfir þessu eins og eðlilegt er, en það er alltaf sami hugurinn í fólkinu, það er mikil þrautseigja og mikil samstaða sem maður fann,“ segir Ásthildur.

Frétt af mbl.is

Eldsvoðinn „rosalegt áfall“

Um tíu manns starfa hjá Hrísey Seafood og segir Ásthildur að bæjaryfirvöld muni gera hvað þau geta til að bregðast við áhrifum brunans á atvinnulíf í eyjunni.

„Við vonumst til að þetta verði tímabundin áhrif og að vinnslan fari aftur af stað, við vonumst til þess. En menn þurfa að sofa á stöðunni og hugsa næstu skref. Að sjálfsögðu þurfum við að styðja við byggðina í Hrísey.“

Slökkvistarf hefur staðið yfir frá því snemma í morgun. Ljósmynd/Ásthildur Sturludóttir

Ásthildur segist skynja mikla samstöðu meðal Hríseyinga. „Það er nú bara þannig að í svona litlum samfélögum stendur fólk saman og styður hvort annað.“