Innlent | mbl | 12.12.2021 | 20:05

Áherslumunur eðlilegur hjá stórum flokki

Eyþór Laxdal Arnalds, oddviti Sjálfstæðisflokksins í borgarstjórn Reykjavík segir áherslumun í einstaka málum eðlilegan í stórum flokki. mbl.is/Kristinn Magnússon

Eyþór Arnalds, oddviti sjálfstæðismanna í borgarstjórn, segist ekki sammála þeirri fullyrðingu að Sjálfstæðisflokkurinn sé þríklofinn. Segir hann ljóst að áherslumunur sé hjá stórum flokki en bendir á að borgarstjórnarhópurinn sé að langmestu leyti samstiga.

Dóra Björt Guðjónsdóttir, borgarfulltrúi Pírata, lét þau ummæli falla í Silfrinu í morgun að Sjálfstæðisflokkurinn væri „tví- ef ekki þríklofinn flokkur“ og ekki væri ljóst fyrir hvað hann stæði. Eyþór gefur lítið fyrir þessi ummæli Dóru.

Ekki allir fylgt meginlínunni

„Það sem hefur klofnað á kjörtímabilinu er þá aðallega brot úr meirihlutanum. Einn Pírati hættir og svo tveir úr Samfylkingu en á sama tíma sjáum við fyrrum varaborgarfulltrúa Miðflokks ganga til liðs við okkur, þannig við í raun stækkum,“ segir hann í samtali við mbl.is.

Hann segir rétt að í stórum flokki geti verið áherslumunur í einstaka málum og vísar hann þá sérstaklega til samgöngumála og málefni Laugavegar. „Þessi mál hafa verið með þeim hætti að ekki allir í okkar hópi hafi fylgt meginlínunni. Það hefur komið upp að einn og einstaka sinnum tveir borgarfulltrúar greiði ekki atkvæði í samræmi við aðra borgarfulltrúa flokksins. Það er bara staðreynd.“

Frétt af mbl.is

Segir Sjálfstæðisflokkinn þríklofinn í borginni

Sama sinnis og kjósendur flokksins

Hann segir þó ljóst að slíkt hafi gerst hjá borgarfulltrúum meirihlutans. „Þar hafa borgarfulltrúar einnig setið hjá í einstaka málum.“

Spurður út í fullyrðingu Dóru þess efnis að óljóst sé hvað flokkurinn stendur fyrir segir hann:

„Það er alrangt hjá henni. Langstærstur hluti hópsins er algjörlega samstiga og það sem meira er þá eru sjálfstæðismenn í borginni sama sinnis og sjálfstæðismenn í borgarstjórn. Það skiptir miklu máli að stærstur hluti hópsins og kjósendur hans eru sammála.“