Innlent | mbl | 21.12.2021 | 19:49

Hættan á að stinga sig á nálum mjög ýkt

„Það er auðvitað hætta á að stinga sig á nál sem að þú finnur en hún er mjög ýkt,“ segir Halldóra Guðmundsdóttir, forstöðukona Konukots um áhættuna við nálar sem kunna að finnast á víðavangi sem jafnvel hafa verið notaðar til vímuefnaneyslu í æð.

Frétt af mbl.is

Líka hlegið í Konukoti – ekki eymdin út í gegn

Konukot er neyðarskýli fyrir heimilislausar konur, margar konur sem leita þangað eru í þungri fíkniefnaneyslu og nota fíkniefni í æð. Nálar sem notaðar hafa verið í slíka neyslu valda oft hræðslu.

Líka hlegið í Konukoti

Halldóra segir að þegar fólk smitast af sjúkdómum af notuðum nálum sé um uppsafnaðar líkur að ræða. „Það þarf að vera frekar fersk nál og þeir sem eru að smitast af einhverju af notuðum nálum, þetta eru yfirleitt uppsafnaðar líkur. Ítrekað notaður sami búnaðurinn,“ segir Halldóra.

Heimilisleysi, skaðaminnkun og nálaskiptaþjónusta

Halldóra er gestur Karítasar Ríkharðsdóttur í Dagmálum þar sem hún fer yfir starfsemi Konukots og aðstæður þeirra kvenna sem þangað leita, jólin í kotinu, skaðaminnkandi hugmyndafræði og margt fleira.

Frétt af mbl.is

Jólagjafirnar sem nýtast best í Konukoti

Hún bendir á að þegar fólk sem er í neyslu er heimilislaust er líklegra að búnaður á borð við nálar og sprautur sé skilinn eftir á víðavangi. „Ef að það er flott skaðaminnkandi þjónusta þá er verið að farga þessum nálum. Það er verið að passa upp á að hafa yfirsýn yfir þetta og heimilisleysi veldur því oft að fólk er að nota úti. En ef fólk er með heimili þá er það yfirleitt mjög ábyrgt í þessu,“ útskýrir Halldóra.

Skaðaminnkunarþjónustan Frú Ragnheiður sækir og fargar nálaboxum og nálum. Fólk sem að verður vart við nálar getur ýmist óskað eftir að þær séu sóttar, hent þeim sjálft ef það er hetta á þeim eða komið í nálabox sem er til dæmis að finna fyrir utan Konukot.

Viðtalið við Halldóru má nálgast í heild sinni hér.