Ekki er útlit fyrir að aðalfundi Eflingar verði flýtt þrátt fyrir kröfu Sólveigar Önnu Jónsdóttur, nýkjörins formanns félagsins, þess eðlis. Trúnaðarráð Eflingar hafði einnig ályktað um að aðalfundi félagsins skyldi flýtt og að hann færi fram fyrir 15. mars. Að öllu óbreyttu fer fundurinn hins vegar ekki fram fyrr en 8. apríl næstkomandi.

Frétt af mbl.is

Ætla sér ekki að flýta aðalfundi Eflingar

Sól­veig fól Gunn­ari Inga Jó­hanns­syni hæsta­rétt­ar­lög­manni að krefjast upp­lýs­inga um það fyr­ir hönd B-list­ans hvenær boðað yrði til aðal­fund­ar og stjórn­ar­skipta. Kröfu­bréf var sent á Agnieszku Ewu Ziół­kowska sem er sitj­andi formaður Efl­ing­ar.

Fram kom í svari við bréfinu að ljúka þyrfti reikningum félagsins fyrir aðalfund, en að þeirri vinnu yrði ekki lokið fyrr en í apríl. Þá hefur verið bent á að í lögum Eflingar sé kveðið á um að félagsmenn geti skilað inn tillögum að lagabreytingum út marsmánuð.

Í samtali við mbl.is í lok febrúar sagði Gunnar Ingi þó ekki útséð um það að aðalfundurinn færi fram fyrir 15. mars. Það væri enn krafa hans skjólstæðings. Stjórnin stóð hins vegar fast á sínu og ekki tókst að ná því í gegn.

Ekkert því til fyrirstöðu að flýta fundinum

Gunnar Ingi segir að lítið mál hefði verið að flýta fundinum, ef vilji hefði verið fyrir því.

„Það hefði ekki verið neitt til fyrirstöðu að hafa hann fyrr. Það hefði verið hægt að kalla saman félagsfund og skera úr um þessi atriði. Það var óskað eftir því að hann yrði haldinn en stjórnin varð ekki við því,“ segir Gunnar í samtali við mbl.is.

Frétt af mbl.is

Krefst stjórnarskipta með hjálp lögmanns

Aðalfundur Eflingar fer því væntanlega ekki fram fyrr en 8. apríl, en Sólveig tekur þá við formannssætinu af Agnieszku. Sú síðarnefnda verður aftur varaformaður félagsins, en hún tók við formannssætinu af Sólveigu þegar hún sagði af sér í lok október á síðasta ári.

Tengdar fréttir

Væringar innan Eflingar

„Þetta ástand er bara ekki í lagi“

• Segir enga lögvarða hagsmuni til staðar
• Léttir að þurfa ekki að sitja undir fúkyrðaflaumi
• Vísað á dyr ef hún hyggst mæta á fundina
• Framkoma í garð Ólafar innanfélagsmál Eflingar

» Fleiri tengdar fréttir

• Blogga um frétt