Utanaðkomandi kraftar líklega að verki
Setja bókamerki
Kaldavatnslögnin sem rofnaði í Hvassaleitinu virðist hafa farið í sundur á samskeytunum. Fyrstu vísbendingar gefa til kynna að utanaðkomandi kraftar hafi sprengt lögnina en það liggur þó ekki fyrir. Mun það koma betur í ljós mögulega síðar í dag eða á morgun en verið er að klára að grafa frá lögninni.
Þetta segir Jón Trausti Kárason, forstöðumaður veitna og fráveitna hjá Veitum.
Mikill vatnselgur myndaðist þegar lögnin fór í sundur og vatn flæddi í stríðum straumum um hverfið síðasta föstudag. Vatn flæddi meðal annars inn í kjallara, bílskúra og bíla, með tilheyrandi tjóni.
„Við erum fyrst að sjá skemmdina núna. Það sem að hefur gerst er að hún hefur farið í sundur á samskeytum og það bendir til þess að það hafi verið einhverjir utanaðkomandi kraftar sem hafi í rauninni sprengt lögnina. Það eru fyrstu getgátur uppi um það.“
Lögnin er frá 1962 en nýtingartími sambærilegra lagna mun þó geta verið allt að hundrað ár.
Samverkandi þættir
Erfitt er að segja nákvæmlega til um hvaða utanaðkomandi kraftar gætu hafa orsakað tjónið, að sögn Jóns Trausta, sem bendir jafnframt á að um marga samverkandi þætti gæti verið að ræða.
„Svo getur líka verið að það hafi orðið þarna eitthvert sig sem hefur orðið þess valdandi að það kemur óeðlileg spenna á þessi samskeyti, þannig að það er einn möguleiki sem okkur finnst allt eins geta verið líklegur. Það verður að koma í ljós hvað við getum í rauninni á endanum sagt til nákvæmlega hvað gerðist,“ segir Jón Trausti.
„Jarðhræringar geta líka hafa haft áhrif þarna en það er eiginlega ómögulegt að segja til um það. En þegar við erum komnir vel niður að lögninni þá sjáum við vonandi eitthvað meira sem getur varpað einhverju frekari ljósi á þetta.“
Umfang tjónsins liggur ekki fyrir
Aðspurður segir Jón Trausti umfang tjónsins ekki liggja fyrir að svo stöddu. Heimsóknir tryggingafélaga til tjónþola séu að hefjast en það ferli muni taka nokkra daga.
Áður hefur komið fram að gera megi ráð fyrir því að allt tjón verði bætt.
Tíu látnir eftir að bíl var ekið á mannfjölda
Kjaraviðræður kennara „seinlegt verkefni“
Tíu látnir eftir skotárás á veitingastað
Hvítá flæðir yfir bakka sína
Aðgerðum slökkviliðs lokið
Ísland taki virkan þátt í öryggis- og varnarmálum
Fluttur af gjörgæslu eftir hnífaárás
Fáni Ríkis íslams fannst í bifreiðinni