Fimm lentu annars staðar vegna hótunarinnar
Setja bókamerki
Fimm flugvélar frá flugfélögunum Play, Wizz Air, Transavia og Lufthansa þurftu að lenda annars staðar en á Keflavíkurflugvelli vegna hótunar sem barst seint í gærkvöldi um að sprengja væri um borð í fraktflugvél.
Að sögn Guðjóns Helgasonar, upplýsingafulltrúa Isavia, lentu tvær vélar á Egilsstöðum, ein á Akureyri, ein í Edinborg og ein í Glasgow, en tvær af vélunum fimm voru frá Play á leið heim til Íslands frá Spáni.
Fjórar af vélunum fimm lentu á Keflavíkurflugvelli „ekki löngu eftir að það var mögulegt að lenda aftur“, segir Guðjón og bætir við að flugvél Lufthansa hafi átt að koma til Keflavíkur í morgun.
Fjögurra klukkustunda röskun
Fram kom í frétt mbl.is í gærkvöldi að allri flugumferð hafi verið frestað eftir að sprengjuhótunin barst. Flugvélum sem voru á leið yfir Atlantshafið var mörgum hverjum snúið við, auk þess sem sumar hringsóluðu við landið.
Guðjón segir að umrædd fraktflugvél hafi lent klukkan rétt rúmlega 23 í gærkvöldi og að flugumferð á Keflavíkurflugvelli hafi hafist á nýjan leik um þrjúleytið í nótt. Hann nefnir að flugumferð á flugvellinum hafi gengið samkvæmt áætlun í morgun.
Öflug viðbrögð
Samkvæmt þeim ferlum sem fylgt er þegar mál sem þessi koma upp á Keflavíkurflugvelli tekur lögreglan við aðgerðastjórn og að sögn Guðjóns voru viðbrögð lögreglustjórans á Suðurnesjum og hans embættis öflug.
Fraktflugvélin var á leiðinni frá Þýskalandi til Bandaríkjanna og átti ekki að millilenda hér á landi en eftir að hótunin barst var Keflavíkurflugvöllur nálægasti flugvöllurinn þegar aðstæðurnar sköpuðust.
„Þetta er það skyndilegasta og umfangsmesta í stuttan tíma sem ég man eftir,“ segir Guðjón, spurður hvort viðbrögðin hafi verið á meðal þeirra umfangsmestu hjá Isavia þegar kemur að málum sem þessum.
Viðræður ekkert þokast frá því á þriðjudag
Hópur fólks reyndi að komast að eldgosinu
Fullvissa ferðamenn um að hér sé öruggt
„Höfum sloppið bærilega með skaða af þessu gosi“
Litlar líkur á að hraunið nái til mannvirkja
Sólveig Anna furðar sig á aðferðum kennara
Drónamyndskeið frá hápunkti gossins í nótt