Innlent | mbl | 14.9.2023 | 8:25

„Samtal sem þarf að hafa kjark til að taka“

„Við erum auðvitað gríðarlega vonsvikin enn eina ferðina að ekki hafi náðst meiri árangur í þessum leikskólamálum,“ segir Hildur. Samsett mynd

Margir telja lausnina við leikskólavanda borgarinnar felast í því að hækka laun leikskólakennara, en ef svo á að vera þarf samhliða að ræða hækkun leikskólagjalda og kalla fram afstöðu foreldra til þess, að mati Hildar Björnsdóttur, oddvita Sjálfstæðisflokksins í Reykjavík.

„Kannski væri betra að hafa gjaldið örlítið hærra ef það yrði til þess að bæta þjónustuna,“ segir oddvitinn í samtali við mbl.is.

Í byrjun mánaðar voru samtals 658 börn, tólf mánaða og eldri, á biðlista eftir leikskólaplássi í borgarreknum leikskólum. Til viðbótar bíða 67 börn eftir flutningi úr sjálfstætt starfandi leikskólum í Reykjavík.

Hildur segir ástandið í leikskólamálum óásættanlegt og að meirihlutinn hafi ekki sett það í pólitískan forgang, líkt og nauðsynlegt sé að gera.

„Við erum auðvitað gríðarlega vonsvikin enn eina ferðina að ekki hafi náðst meiri árangur í þessum leikskólamálum,“ segir Hildur.

„Staðan er enn þá mjög slæm, þrátt fyrir mjög fögur fyrirheit og loforð í kosningum fyrir rétt rúmu ári síðan þar sem að því var lofað að öll 12 mánaða börn myndu fá inngöngu á leikskóla strax það haustið.“

Meðalaldur barna við inngöngu í leikskóla sé þó í kringum 22 mánaða og því sé enn mjög langt í land.

Frétt af mbl.is

658 börn á biðlista eftir leikskólaplássi

Vill að málið verði sett í forgang

„Það sem við höfum viljað sjá er auðvitað að málið verði sett í forgang og að fólk myndi skynja að þetta sé pólitískt forgangsmál hjá þessum meirihluta. Við höfum líka bent á það að það sé ekki ein lausn sem henti öllum fjölskyldum.“

Hún viðurkennir að vandamálið sé flókið og að ekki sé til staðar töfralausn sem geti leyst það á einni nóttu.

„Það þarf að leysa þetta með margþættum lausnum, eitt er að fjölga leikskólaplássum. Svo þarf að styðja betur við dagforeldra stéttina og jafnframt tryggja kost á heimgreiðslum til þeirra sem kjósa að dvelja lengur heima með börnunum sínum og létta þannig um leið á biðlistum leikskólanna.“

Þá sé einnig vert að skoða möguleikann á því að koma af stað tilraunaverkefni í grunnskólum sem snýr að því að leyfa fimm ára börnum að hefja skólagöngu ári fyrr.

„Það myndi létta á einhverjum leikskólum en það hefur ekki fengist neitt samtal í borginni um það. Þau hafa raunar almennt verið frekar hrædd að hugsa í stórum lausnum.“

Fóru í „langt og notalegt sumarfrí“

Þú upplifir þá ekki að þetta mál sé sett í forgang hjá meirihlutanum?

„Nei alls ekki. Í kjölfar síðustu kosninga tekur Framsóknarflokkurinn við þessum málaflokki og svo virðast þau bara hafa farið í langt og notalegt sumarfrí og brugðið í brún þegar þau komu til baka í Ráðhúsið, fullt af foreldrum að mótmæla.

Ég segi það nú fyrir okkur í Sjálfstæðisflokknum að ef okkur hefði verið falið að leiða þennan málaflokk þá hefðum við ekki farið í sumarfrí heldur legið yfir því að leita lausna yfir sumarið því þetta er alltaf mjög fyrirsjáanlegt vandamál á haustin.“

Uppsafnaður viðhaldsvandi

Spurð hvernig hægt væri að fjölga leikskólaplássum, líkt og hún minnist á að þurfi að gera, segir Hildur það flókið verk.

„Ein af ástæðunum að plássin eru ekki fleiri er auðvitað þessi margra ára uppsafnaði viðhaldsvandi á skólahúsnæði í borginni. Það eru hátt í 300 pláss sem eru ónothæf núna af því að viðhaldi hefur ekki verið sinnt og húsnæðið er ónothæft vegna myglu eða raka,“ segir Hildur, en bætir við að einnig þurfi að leysa mönnunarvandann.

„Hvernig fáum við fólk til liðs við leikskólana hjá Reykjavíkurborg? Þar hefur verið ýmislegt rætt eins og að setja leikskóladaginn upp meira eins og grunnskóladaginn. Að faglegt starf fari fram á ákveðnum tíma innan dagsins og hinar stundirnar séu meira í líkingu við frístund. Þetta er eitthvað sem maður hefur heyrt að leikskólakennurum hugnist og mætti skoða betur.“

En hvað með að hækka laun leikskólastarfsmanna?

„Það þyrfti þá að skoða í samhengi við hvort að það eigi að hækka leikskólagjöldin. Eins og staðan er í dag þá er rekstri borgarinnar ekki þannig háttað að það sé hægt að hækka laun. en þetta eru auðvitað gríðarlega mikilvæg störf og það er bara samtal sem þarf að hafa kjark til að taka, hvort það sé ástæða til að hækka leikskólagjöld svo einhverju nemur.

Það kostar nærri 400 þúsund krónur á mánuði fyrir sveitarfélagið að vera með 12 mánaða barn á leikskóla. Þetta er svakalega mikið niðurgreidd þjónusta og meirihlutinn hefur stært sig af því að vera með ódýrustu leikskólana, sem er mjög mótsagnakennt. Það er svolítið eins og að auglýsa ódýrustu matvöruna í verslun sem er með tómar hillur og engar vörur að bjóða. Það er lítið gagn af ódýru leikskólaplássi þegar að þú hefur ekki aðgengi að plássum. Kannski væri betra að hafa gjaldið örlítið hærra, geta fengið fleira fólk til starfa og boðið betri þjónustu.“