Fleiri stofnunum gert að tjá sig um plastbarkamál
Setja bókamerki
Fleiri stofnunum en Landspítala verður gert að taka afstöðu til plastbarkamálsins svokallaða. Landspítali hefur beðið ekkju Andemariam Beyene afsökunar á sínum þætti í málinu en vangaveltur eru um það hvort fleiri stofnanir beri ábyrgð.
Þannig hafa Háskóli Íslands og Sjúkratryggingar Íslands (SÍ) verið gagnrýndar í tengslum við málið. Háskóli Íslands sökum þess að Tómas Guðbjartsson var skrifaður fyrir vísindagrein sem birtist um aðgerðina í tímaritinu Lancet árið 2011.
Þá borguðu SÍ hluta ferðakostnaðar Andemariam Beyene þegar hann fór til Svíþjóðar þar sem gervibarki var græddur í hann.
Áfrýjunardómstóll í Svíþjóð dæmdi á dögunum ítalska skurðlækninn Paolo Macchiarini í tveggja og hálfs árs fangelsi fyrir að græða plastbarka í þrjá sjúklinga á Karólínska sjúkrahúsinu í Stokkhólmi. Meðal sjúklinga var Andemariam.
Ekki sjálfkrafa bótaskylda
Eins og fram hefur komið vísaði Runólfur Pálsson, forstjóri Landspítalans, erindi lögmanns ekkju Andemariam um bætur til ríkislögmanns. Þá bað hann hana jafnframt afsökunar á hlut spítalans í málinu.
Að sögn Fanneyjar Rósar Þorsteinsdóttur ríkislögmanns er afsökunarbeiðni Landspítala og vísun til embættisins ekki sjálfkrafa viðurkenning á bótaskyldu. Fyrst þurfi embættið að leita umsagnar þar til bærra aðila. Meðal annars frá ólíkum ráðuneytum og stofnunum. Við blasir að heilbrigðisráðuneytið og Landspítali verði beðin um umsögn en að sögn hennar er of snemmt að segja til um það hvaða fleiri ráðuneyti og stofnanir verði beðnar um umsagnir um málið.
Oft fleiri en ein stofnun
Hún segir að næstu skref verði að afla gagna frá stofnunum sem geti upplýst frekar um málið. Eins verði þær beðnar um að taka afstöðu til málsins.
„Það mun berast bréf frá okkur til viðeigandi aðila. Oft eru þetta fleiri en ein stofnun og ráðuneyti sem eru þarna undir,“ segir Fanney.
„En það sem er óvenjulegt í þessu máli er það að vanalega beina lögmenn kröfum sínum beint til ríkislögmanns. En í þessu tilfelli fer hann til Landspítala sem svo beinir erindinu til okkar,“ segir Fanney.
Sparnaður heimila vex meira en áður var talið
Á algjöru frumstigi eftir þrjár vikur af verkfalli
Átti ekki að láta pirring bitna á sjúklingi
Búseta skortir byggingarlóðir
Gosið gæti varað lengur: Meiri fyrirstaða í gosrásinni
Erlendir miðlar greina frá tíunda gosinu
Heitt vatn fannst sem gæti annað 10 þúsund manns
Þórarinn: Tafir á höfuðborgarsvæðinu ekki minni