Innlent | mbl | 19.2.2024 | 14:27

Hettusótt líklegri meðal árganganna 1985–1987

Guðrún Aspelund sóttvarnalæknir. mbl.is/Eggert Jóhannesson

Fjögur tilfelli hettusóttar hafa nýlega greinst á landinu. Guðrún Aspelund, sóttvarnarlæknir segir útbreiðslu sjúkdómsins líklegri meðal fólks fædds á árunum 1985-1987.

„Málið með þessi ártöl er að það var byrjað að bólusetja gegn hettusótt '89 [...] og hettusótt hafði gengið svona reglulega á Íslandi fram að '84. Þannig það eru þessi ár þarna rétt á undan, þessi klemmuár '85-'87 þar sem þessir krakkar, sem eru það lítil þarna, fengu líklega ekki hettusótt en voru heldur ekki bólusett,“ segir Guðrún í samtali við mbl.is.

Hún segir ekki miklar líkur á að faraldur breiðist út hér á landi, þó að auðvitað sé aldrei hægt að fullyrða um slíkt. Ekki sé ólíklegt að nokkur tilfelli til viðbótar greinist hjá þeim sem hafi komist í návígi við smitaða.

Frétt af mbl.is

Hettusótt greindist á höfuðborgarsvæðinu

Fólk fætt eftir 1980 hafi smitast

Guðrún segir einnig vert fyrir þá sem fæddir eru eftir 1980 að athuga hvort þeir séu fullbólusettir við hettusótt, en sumir hafi aðeins fengið einn skammt eða jafnvel ekki verið bólusettir yfirhöfuð. Þeir sem séu fæddir fyrir þann tíma hafi líklegast þegar smitast af hettusótt.

„Við vorum að kíkja á þetta og þeir sem eru fæddir eftir 1980, það fólk hefur líka verið að fá hettusótt í þessum faröldrum sem gengu hérna eins og 2015-2016,“ segir Guðrún og bætir við að það sama hafi gilt í faraldri sem reið yfir landið á árunum 2005-2006.

Mælst sé til þess að fólk sé fullbólusett við veirunni þó að ekki séu miklar líkur á smiti að svo stöddu. Hún segir fullbólusetta ekki þurfa að hafa áhyggjur af smiti þó svo að hjarðónæmni sé ekki algjör.

„Nei þið þurfið ekki að stressa ykkur en bólusetningin er ekki alveg eins virk við hettusótt eins og fyrir mislinga. 90% virkni er mjög góð en það er 97% fyrir mislinga.“

Frétt af mbl.is

Segir fólki að huga að bólusetningu við hettusótt

Enn aðeins eitt mislingasmit

Að auki hettusóttarsmitana greindist einnig eitt tilfelli mislinga þann 3. febrúar síðastliðinn í ferðamanni sem hingað hafði ferðast.

Spurð hvort fleiri tilfelli hafi greinst síðan þá svarar Guðrún neitandi. Hún segir þó ekki tímabært að lýsa því yfir að landinn sé þar með alveg sloppinn frá smithættu.

„Það er alltaf hugsanlegt að einhver leynist einhversstaðar,“ segir Guðrún og bætir við að venjan sé að bíða í tvo meðgöngutíma þ.e. sex vikur þar til hægt sé að koma með slíkar yfirlýsingar.