Innlent | mbl | 12.7.2024 | 13:37

Munu höfða mál gegn ríkinu vegna plastbarkamálsins

„Ég hef sagt ríkislögmanni að við munum höfða mál. Við viljum fá það á hreint hvort það sé allt í lagi pynta menn á Íslandi og gera á þeim tilraunir,“ segir Sigurður G. Guðjónsson lögmaður ekkju Andemariam Beyene. mbl.is/María Matthíasdóttir

Kröfu ekkju Andemariam Beyene, sjúklings í umsjá Landspítala sem lést eftir að hafa undirgengist plastbarkaígræðslu í Svíþjóð, um miska- og skaðabætur hefur ekki verið slegið út af borðinu þó ríkið hafi hafnað bótaskyldu, að sögn Sigurðar G. Guðjónssonar lögmanns ekkjunnar.

„Svarið sem kom er þannig að það er fullt tilefni til að halda áfram. Því er ekki neitað að eitthvað hafi verið saknæmt heldur að þessi háttsemi hafi ekki leitt til tjóns sem er bótaskylt,“ segir Sigurður.

Málinu er því ekki lokið af ykkar hálfu?

„Ég hef sagt ríkislögmanni að við munum höfða mál. Við viljum fá það á hreint hvort það sé allt í lagi pynta menn á Íslandi og gera á þeim tilraunir. Dómstólar verða að skera úr um það.“

Frétt af mbl.is

Ríkið hafnar bótagreiðslu vegna plastbarkamálsins

Tilraunaaðgerð

Plastabarkamálið svokallaða snýst um tilraunaaðgerð sem gerð var á Andemariam Teklesenbet Beyene árið 2011. Hann lést árið 2014, um þremur árum eftir ígræðslu plastbarka á Karólínska sjúkrahúsinu í Svíþjóð.

Eftir andlátið vöknuðu ýmsar efasemdir um þá verkferla sem lágu að baki vísindarannsóknunum sem tengdust aðgerðinni á Andemariam og síðar fleiri sjúklingum, sérstaklega í kjölfar uppljóstrun læknis frá lækni sem kom að meðhöndlun hans í Svíþjóð.

Paolo Macchiarini sem framkvæmdi aðgerðina hefur verið dæmdur fyrir háttsemi sína og fjöldi lækna hafa verið uppvísir af vísindalegu misferli, þar á meðal tveir íslenskir læknar.

Frétt af mbl.is

Fær tveggja og hálfs árs dóm í plastbarkamáli

Pólitísk ákvörðun

Spurður hver næstu skref eru segir Sigurður að líklega verði ekki mikið sem gerist í málinu fyrr en í ágúst þar sem fólk flest er í leyfi. „Ég myndi vilja hitta ríkislögmann, forstjóra Landspítalans og fulltrúa heilbrigðisráðuneytisins,“ segir hann.

Sigurður segir svo virðast að heilbrigðisráðuneytið hafi lagst gegn bótaskyldu miðað við að vísað hafi verið til umsagnar þeirra í svari ríkislögmanns, umsögn sem hann hafi þó ekki séð og óljóst hvort hann fái að sjá.

Staðan er því nokkuð frábrugðin því er forstjóri Landspítala bað ekkjuna afsökunar og vísaði bótakröfunni til ríkislögmanns, nokkuð sem Sigurður sagði þá vera skýra viðurkenningu á bótaskyldu.