Meirihluti Samfylkingarinnar og Vinstri grænna í Hafnarfirði er fallinn samkvæmt nýrri skoðanakönnun Félagsvísindastofnunar Háskóla Íslands fyrir Morgunblaðið. Samfylkingin tapar miklu, fer úr 40,1% árið 2010 í 24% núna.

Flokkurinn fær þrjá bæjarfulltrúa í stað fimm. Vinstri græn tapa einnig miklu fylgi, fá 8,2% í stað 14,6% árið 2010, en halda sínum eina fulltrúa.

Björt framtíð og Píratar verða sigurvegarar kosninganna samkvæmt könnuninni. Hvorugur flokkanna hefur áður boðið fram til sveitarstjórnar. Fylgi Bjartrar framtíðar mælist 20,4% sem gefur tvo bæjarfulltrúa. Píratar eru með 8,1% fylgi sem tryggir þeim einn mann í bæjarstjórn.

Sjálfstæðisflokkurinn verður stærsti flokkurinn í bænum en tapar talsverðu fylgi og missir einn bæjarfulltrúa. Fylgi hans mælist 31,6% en var 37,2% fyrir fjórum árum. Fær flokkurinn fjóra bæjarfulltrúa, að því er fram kemur í fréttaskýringu um fylgismælingu þessa í Morgunblaðinu í dag.

Tengdar fréttir

Sveitarstjórnarkosningar

„Framsóknarlegt að vilja bara borgarstjórastólinn“

• „Það hefur aldrei reynt á það í sögu borgarinnar“
• Ekki skýrt hvort Framsókn sé til vinstri eða hægri
• Yngsti borgarfulltrúinn: „Þetta er ákall um breytingar“
• Hafna Borgarlínu og vilja betri rekstur

» Fleiri tengdar fréttir