Reykvíska kvintettinn Amor skipa Hrannar Ingi Arnarsson hljómborðsleikari, Eydís Ýr Jóhannsdóttir söngkona, Gunnar Franz Árnason bassaleikari, Guðmundur Hermann Lárusson gítarleikari og Árni Björn Þórisson trommuleikari. Þau eru á aldrinum 15 til 17 ára. Hljómsveitin var stofnuð í Árbænum haustið 2017 og starfaði lengstaf undir SIF en tók nýverið upp heitið Amor. Tónlistin er fönkað popp með djassívafi.
Barrrok er úr Reykjavík, tríó þeirra Margrétar Helgu Snorradóttur, sem leikur á gítar, ukulele og mandólín, Matthíasar Löve, sem leikur á fiðlu, og Elínar Bryndísar Snorradóttur, sem leikur á trommu. Þau eru 17 til 19 ára og tóku upp samstarf í byrjun árs. Þau segja tónlistina fjölbreytta og erfitt að skilgreina hana.
Garðbæingarnir Hrannar Ingi Benediktsson, Kara Rós Valþórsdóttir, Theodór Árni Ásbjarnarson, Sara Ósk Þorsteinsdóttir og Sveinbjörn Rúnarsson kalla sig Caravan Kids. Hrannar leikur á bassa, Theodór og Sara á gítara, Sveinbjörn á trommur og Kara syngur. Þau komu saman í desember 2018 til að spila í brúðkaupi og félll samstarfið svo vel að þau ákváu að stofna hljómsveit og spila eigin lög.
Hafnfirðingurinn Darri Tryggvason snýr aftur í Músíktilraunir, en hann var valinn rafheili Músíktilrauna 2018. Hann hefur fengist við tónlist í nokkur ár, vélar um tölvur og rappar.
Félagarnir Tumi Hrannar-Pálmason, sem 21 árs, Guðjón Jónsson, sem er 23, Hafsteinn Davíðsson, sem er 28 og Jóhannes Stefánsson, sem er 20, koma frá Akureyri. Hljómsveitin er hugarfóstur Tuma og stofnuð til að leika lög eftir hann. Tumi leikur á bassa og syngur, Guðjón á hljómborð, Hafsteinn á trommur og Jóhannes á gítar. Fyrsta plötu Flammeusar, The Yellow, er væntanleg í vor.
Tríóið Hugarró er úr Eyjarfjarðarsveit, skipað þeim Hinriki Erni Brynjólfssyni, gítarleikara, Haraldi Helgasyni trommuleikara og Ólafi Tryggvasyni bassaleikara. Hinrik og Ólafur eu 16 ára, Haraldur Helgason 17. Þeir segjast kunna að meta gott pönk.
Þó Meistarar dauðans séu ungir að árum hafa þeir þegar gefið út tvær breiðskífur. Sveitin er úr Reykjavík, skipuð þeim Ásþóri Loka Rúnarssyni gítarleikara og söngvara, sem er 19 ára, Alberti Elíasi Arasyni, bassaleikara og bakraddasöngvara, sem er 18 ára, Þórarni Þey Rúnarssyni trommuleikara og bakraddasöngvara, sem er 15 ára, og Frey Hlynssyni hljómborðsleikara og bakraddasöngvara, sem er 18 ára. Sveitin hefur starfað í níu ár og þó grunnurinn sé þungarokk krydda þeir meðal annars með jazz og fönki.
Dagur Logi Ingimarsson og Árni Jónsson nefna sig Morgunroða og Grána. Þeir eru úr Reykjavík, Dagur 23 ára og Ári 25 ára. Dagur rappar og Árni einnig, en hann vélar að auki um hljóðsmala. Þeir segja framlag byggjast á innihaldsríkri textasmíði og töktum „sem leika við eyru eins og blaut tunga, ásamt fullri körfu af brakandi ferskum ávöxtum fyrir sálarlíf almúgans“.
Tónlistarkonan Soffía Ósk Kristinsdóttir er ættuð frá Eskifirði, en bjó um hríð erlendis. Hún sendi frá sr breiðskífuna In Two í desember síðastliðnum. Soffía er 25 ára gömul, leikur á ukulele og syngur.
