Matur | Veitingastaðir | mbl | 3.10.2016 | 9:04 | Uppfært 29.5.2017 10:07

Sturlaður steinbítur með vínberjum

Steinbítur í piparrjómasósu með vínberjum.

Allir virðast vera að tala um draumkennda uppskrift að dásamlega dúnmjúkum fiskrétti sem baðaður er í rjóma og borinn fram með vínberjum. Mbl.is fór á stúfana og hafði upp á þessari stórgóðu uppskrift.

Snorri Sigfinnsson, yfirkokkur á Messanum, deilir hér með okkur vinsælustu uppskrift staðarins en Messinn hefur á skömmum tíma orðið einn vinsælasti fiskstaður Reykjavíkur. Þessi uppskrift á án efa sinn þátt í því. „Fiskurinn er borinn fram með spínati, ferskri papriku í strimlum og smælki - og hókus pókus,“ segir Snorri matreiðslumeistari. Hann neitar því ekki að gott hvítvínsglas sé vissulega meðlæti sem hann mælir einnig með.

Sturlaður steinbítur - fyrir tvo

400 g steinbítur
200 ml hvítvín
300 ml rjómi
2 msk. rjómaostur
Hveiti til að velta upp úr
1 msk. grillkrydd
1/2 tsk. aromat
1/3 tsk. chillíkrydd
2-3 tsk. nýmalaður pipar
2 msk. fersk steinselja
1 lúka rauð vínber

Fiskinum er velt upp úr hveiti og kryddaður með chillí og aromat.
Því næst er hann steiktur þar til hann verður stökkur.
Þá er honum snúið við á pönnunni og hvítvíninu bætt við.
Næst er það rjóminn og tvær kúffullar matskeiðar af rjómaosti.
Kryddið bætist svo við, 1 msk. grillkrydd, 2-3 msk. svartur, nýmalaður pipar, 2 msk. söxuð steinselja og 1 lúka rauð vínber. Allt fer þetta út á pönnuna sem fiskurinn er svo borinn fram á. Það má gjarnan setja meðlætið með á pönnuna.