Matur | mbl | 13.3.2017 | 16:26

Fullkomið pasta á 20 mínútum

Girnilegt og einfalt. Jennifer Berg / Jen´s Delicious Life

Gott pasta er alltaf klassískt og ekki spillir fyrir þegar rjóminn blandar sér í málið ásamt sólþurrkuðum tómötum og mozzarella-osti. Þessi uppskrift eftir Jennifer Berg er jafn-skotheld og hún er einföld. Þetta er því fullkominn kvöldverður á aðeins tuttugu mínútum.

Jennifer heldur úti bloggsíðunni Jen´s Delicious Life auk þess sem hún er órjúfanlegur hluti af Trentnet.is.

Jennifer Berg er listakokkur.

Uppskrift

350 gr tortellini með ostafyllingu
ólífuolía og salt (til að setja út í vatnið þegar pastað er að sjóða)
1 msk. ólífuolía
1 1/2 dl sólþurrkaðir tómatar í olíu úr krukku. Hellið olíunni af og skerið tómatana í tvennt.
3 hvítlauksgeirar, skornir í þunnar sneiðar
hálfur poki af fersku spínati
4 dl matreiðslurjómi
1/2 tsk. salt
1/2 tsk. paprikuduft
125 gr mozzarella-ostur, skorinn í bita.
10 basillauf, söxuð
rifinn parmesan-ostur

Aðferð:

Sjóðið tortellini samkvæmt leiðbeiningum. Hellið vatninu af og leggið til hliðar.
Setjið sólþurrkuðu tómatana og olíuna á pönnu á miðlungshita. Bætið við hvítlauk og eldið í mínútu eða svo. Bætið við fersku spínati og haldið áfram að elda uns spínatið er orðið mjúkt.
Bætið við matreiðslurjómanum, salti, paprikukryddi og látið suðuna koma upp. Lækkið undir.
Bætið við basillaufunum og tortellini-inu. Blandið vel saman á lágum hita og bætið loks við mozzarella-ostabitunum. Hrærið uns osturinn er farinn að bráðna.
Smakkið og kryddið til eftir smekk.
Berið fram og stráið parmesan-osti yfir diskana.