Matur | mbl | 24.7.2017 | 16:55

Fullkomið mánudags-taco

Ljósmynd: Ljúfmeti og lekkerheit

Eftir sæmlega vel heppnaða helgi veðurfarslega séð er ekki úr vegi að búa til gómsætt taco í kvöldmatinn. Það er frekar sniðugt verður að segjast eins og er og kemur beint úr smiðju Berglindar á Ljúfmeti og lekkerheitum.

Uppskriftin býður upp á skemmtilegar útfærslur en auðveldlega má skipta út hráefnum eða bæta við einhverju sem er í sérlegu uppáhaldi.

Tortillakaka

(uppskrift fyrir 4-6)

1 pakkning með 8 tortillum (medium-stærð)
500 g nautahakk
1 poki taco-krydd
100 g rjómaostur (mér finnst gott að nota philadelphia-rjómaostinn)
1 dl rjómi
150 g maísbaunir
1/2 krukka chunky salsa
salt og pipar
um 300 g rifinn ostur

Aðferð:

Steikið nautahakkið og kryddið með taco-kryddinu. Hrærið rjómaosti, rjóma, salsa og maísbaunum saman við og smakkið til með salti og pipar.
Smyrjið smelluform (hægt að sleppa því og raða tortillakökunum beint á ofnplötu) og setjið tvær tortillakökur í botninn á forminu. Setjið 1/3 af fyllingunni yfir og smá rifinn ost. Setjið tvær tortillur yfir og endurtakið (þannig að það verði 3 lög af fyllingu). Endið með tortillaköku efst og stráið restinni af ostinum yfir. Setjið í 200° heitan ofn í 20-25 mínútur.