Matur | mbl | 4.2.2018 | 14:06

Nakta gulrótarkakan

mbl.is/Berglind Hreiðarsdóttir

Nú halda máski margir að þessi fyrirsögn sé grín en svo er alls ekki. Naktar kökur er ákveðinn stíll þar sem einungis er sett þunnt lag af kremi á kökuna þannig að yfirbragð hennar verður... tja... hrárra og öðruvísi.

Þessi stíll hefur slegið í gegn og hér gefur að líta nakta gulrótarköku úr smiðju Berglindar Hreiðarsdóttur á Gotterí.is sem hún bakaði í tilefni af 40 afmæli eiginmannsins.

Virkilega vel heppnuð og ef Berglind er söm við sig þá bragðast hún líka stórkostlega.

mbl.is/Berglind Hreiðarsdóttir

Nakta gulrótarkakan

Hér er á ferðinni Betty-gulrótarkaka með vanillusmjörkremi á milli, skreytt með hvítu Betty vanilla frosting að utan (til að fá alveg hvítt) og ferskum blómum. Það voru dásamlega fallegar antikbleikar nellikur í Blómavali þennan daginn svo ég fór frá því að kaupa rósir og yfir í þær.

Kaka

1 x Betty Crocker-gulrótarkökublanda

Aðferð:

Blandið kökumixinu samkvæmt leiðbeiningum á pakka og skiptið í 3 x 15 cm stór kökuform og kælið botnana.
Skerið ofan af hverjum botni það sem þarf til þess að þeir verði vel sléttir og staflist betur.

Krem

125 gr. smjör (við stofuhita)
400 gr. flórsykur
2 tsk. vanilludropar
2 msk. síróp (pönnukökusíróp)

Aðferð:

Setjið öll hráefnin nema flórsykur í hrærivélarskálina og hrærið vel saman. Bætið þá flórsykri saman við í litlum skömmtum, skafið niður á milli og hrærið þar til slétt og fallegt.
Smyrjið góðu lagi af kremi á milli botnanna (2 lög) og þunnu lagi á toppinn til að binda alla kökumylsnu þar.

Skreyting

1 dós Betty Crocker Vanilla Frosting
125 gr. flórsykur
Fersk blóm að eigin vali

Aðferð

Blandið saman Betty frosting og flórsykri.
Smyrjið þunnu lagi utan um alla kökuna og yfir vanillukremið á toppnum. Þið viljið fá þekjandi og fallega áferð á toppinn en skafa vel af hliðunum svo það sjáist í hliðarnar á kökunni.
Klippið blóm til, plastið endana og stingið í kökuna.