Matur | mbl | 2.5.2018 | 10:54

Kjúklingur í satay með spínati og fetaosti

Fyrirmyndar kjúklingaréttur í alla staði. mbl.is/Svava Gunnarsdóttir

Fyrir þá sem eru eitthvað daprir yfir kuldanum sem herjar á landann þessa dagana get ég sagt þetta: Örvæntið eigi... nú fögnum við með kjúkling! Hér er um að ræða sjóðheitan og seiðandi kjúkling með spínati og fetaosti - sem er mögulega snjallasta blanda sem hægt er að finna.

Það er meistari Svava Gunnars á Ljúfmeti og lekkertheit sem á uppskriftina en ef hún kann eitthvað þá er það að galdra fram mat sem allir elska.

Kjúklingur í satay með spínati og fetaosti

Uppskrift fyrir 5

4 kjúklingabringur
2 dósir sataysósa
1 rauðlaukur
1 dós fetaostur
150-200 g spínat
3 dl kús kús
3 dl vatn

Aðferð:

Skerið kjúklingabringurnar í bita og steikið í smjöri. Hellið sataysósunni yfir og látið sjóða við vægan hita í 20-30 mínútur.
Hitið vatn að suðu (mér þykir gott að setja 1 kjúklingatening í vatnið), hrærið kús kús út í, setjið lok á pottinn og takið af hitanum. Látið standa í 5 mínútur.
Setjið kús kús, niðurskorinn rauðlauk, fetaost og spínat út í kjúklinginn og berið fram.