Matur | mbl | 4.7.2018 | 11:03

Stórkostleg Nutella-pönnupítsa með ís

mbl.is/Linda Ben

Þessi pítsa er svo auðveld og snjöll að hún á pottþétt eftir að slá í gegn á heimilium landsmanna sem þurfa eitthvað bragðgott til að hugga sig við.

Hér þarf bara eitt stykki steypujárnspönnu en það er í sjálfu sér ekki nauðsynlegt enda er þetta bara ofnbökuð pítsa með Nutella og almennri hamingju.

Það er Linda Ben sem á heiðurinn að uppskriftinni sem er ekki amaleg.

Nutella-pönnupizza með ís

Tilbúið pizzadeig
2-3 msk. Nutella
u.þ.b. 10 kirsuber (magn fer eftir smekk)
u.þ.b. 12-15 brómber (magn fer eftir smekk)
u.þ.b. 1 dl bláber (magn fer eftir smekk)
Nokkur lauf fersk mynta (magn fer eftir smekk)
Vanillurjómaís (magn fer eftir smekk)

Aðferð:

Kveikið á ofninum og stillið á 220°C.
Setjið um það bil 1 msk. af olíu í 30 cm steypujárnspönnu og smyrjið pönnuna vel að innan.
Setjið pizzadeigið ofan í pönnuna og teygið pizzadeigið vel ofan í svo það þeki út í alla kanta pönnunnar. Setjið pönnuna inn í ofninn og bakið deigið í um það bil 15 mín. eða þar til botninn er orðinn fallega gullinbrúnn.
Á meðan pizzan er í ofninum, skolið berin, skerið kirsuberin í tvennt og fjarlægjið steininn.
Takið pizzuna út úr ofninum, leyfið henni að kólna í um það bil 3-5 mín., smyrjið hana með Nutella, skreytið með berjum, myntulaufum og ís.