Matur | mbl | 10.9.2018 | 14:04 | Uppfært 14:34

Dásemdar fiskréttur innblásinn af Tjöruhúsinu

mbl.is/Ragnar Freyr Ingvarsson

Hér gefur að líta blálöngu sem er afbragðsfiskur í alla staði - bragðgóð og afar þétt og góð í sér enda í algjöru uppáhaldi hjá mörgum.

Þessi uppskrift er innblásin af hinum rómaða veitingastað Tjöruhúsinu á Ísafirði en það er enginn annar en Ragnar Freyr Ingvarsson eða læknirinn í eldhúsinu sem á heiðurinn að uppskriftinni.

Blálanga í tælenskri piparsósu, með ferskum agúrkum og kóríander

Fyrir 6

1,2 kg blálanga
1 kúrbítur
3 vorlaukar
1 rauðlaukur
2 hvítlauksrif
3 msk. piparsósa
2 msk teriyakisósa
1 msk. soyasósa
hálf agúrka
1/2 fínt skorin papríka
50 g smjör
3 msk.
salt og smá pipar

Aðferð:

Byrjaði á því að sneiða rauðlaukinn, hvítlaukinn, kúrbítinn og vorlaukinn (sparaði endana til að skreyta með í lokinn) í olíu og smjöri þangað til að þetta varð mjúkt og ilmandi. Saltaði og pipraði lítillega. Skar svo blálönguna í bita.
Kom svo fiskinum fyrir á pönnunni og saltaði og pipraði og steikti á báðum hliðum.
Ég hafði keypt þessa sósu í Víetnam market - en hún er ljómandi góð. Vilji maður hafa minni hita í réttinum mætti prófa að nota Hoisin-sósu í staðinn. Blandaði piparsósunni, teriyaki og sojasósunni saman. Hellti svo sósunni yfir fiskinn og eldaði hann í gegn í sósunni. Því næst skreytti ég pönnuna með ferskum agúrkum, smátt skornum vorlauksendum og papríkum.
Borið fram með soðnum Basmati-grjónum.
Ég hvet ykkur til að prófa, þetta var einstaklega ljúffengt!