Matur | mbl | 4.10.2018 | 10:53 | Uppfært 5.10.2018 5:18

Fettuccine með ofnbökuðum camembert

mbl.is/Berglind Guðmunds

Hvað er betra en pasta sem er löðrandi í bráðnum camembert og öðru gúmmelaði? Nákvæmlega ekkert enda er þessi uppskrift mögulega á pari við fullkomnun. Hreinræktað haustfæði sem hressir okkur við.

Það er meistari Berglind Guðmundsdóttir á GRGS.is sem á heiðurinn að þessari snilld en matarbloggið hennar Gulur, rauður, grænn og salt er hægt að nálgast HÉR.

Fettuccine með ofnbökuðum camembert
Fyrir 4

500 g Fettucini, t.d. frá Pastella
1 (250 g) camembert-ostur
4 hvítlauksrif
5 blöð fersk basilíka
salt og pipar
extra virgin ólífuolía
parmesan, rifinn
1 box kirsuberjatómatar
150 g ferskt spínat
100 g pekanhnetur, ristaðar

Aðferð:

Takið ostinn úr kassanum og setjið í álpappír og vefjið honum lauslega um ostinn svo hann leki ekki um allt (sjá mynd að neðan). Skerið toppinn af ostinum.
Skerið hvítlaukinn í sneiðar og þrýstið lítillega ofan í ostinn. Setjið basilíku yfir allt, piprið og hellið ólífuolíu yfir ostinn.
Setjið í 180°C heitan ofn í um 20-25 mínútur eða þar til osturinn er bráðinn. Á sama tíma skerið tómatana í tvenn, hellið ólífuolíu yfir tómatana, saltið og piprið og hitið í ofni með ostinum þar til osturinn er farinn að linast.
Sjóðið pastað í saltvatni þar til það er orðið „al dente“.
Setjið olíu á pönnu og léttsteikið spínatið.
Takið camembert-ostinn og tómatana úr ofni þegar það er tilbúið. Látið tómatana og spínatið saman við pastað og stráið parmesan saman við. Kryddið með salti og pipar.
Setjið pastað í skál, látið ostinn yfir pastað og berið fram með hlynsírópi og parmesan.