Matur | mbl | 6.2.2019 | 13:49

Lambakebab með myntujógúrtsósu

mbl.is/María Gomez

„Oft þegar hefur verið lambalæri í sunnudagsmatinn hjá okkur hef ég haft lambakebab úr afgangskjötinu daginn eftir. Eða gert úr því samlokur með remúlaði og steiktum lauk sem minna mikið á samloku með roastbeef,“ segir María Gomez á Paz.is um hugmyndina á bak við þennan rétt. Hún segir þetta snilldarleið til að nýta afgangana en svo sé auðvitað hægt að setja það sem hugurinn girnist á milli.

„Í kebabinn finnst mér gott að hafa hráefni sem minna mig á Mið-Austurlönd eða Marokkó. Döðlur, cous cous, ólífur og gúrkujógúrtsósa með myntu er alveg fullkomið saman.“

Lambakebab með myntujógúrtsósu

Afgangskjöt af lambalæri eða lambahrygg
Grófar tortillakökur úr súrdeigi (frá Santa María)
Ólífur grænar og svartar lagðar í olíu og kryddaðar með salti og þurrum kryddjurtum eins og timian og basil
Kál, tómatar og gúrka
Soðið cous cous
Döðlur (ferskar bestar)
Fetaostur eða ferskar mozzarella kúlur litlar
Gúrkumyntujógúrtsósa

Aðferð

Gerið cous cous og skerið kjötið niður í þunna bita
Hitið tortillu-köku (best á samlokugrilli eða grillpönnu) og setjið svo á hana cous cous
Raðið kjötinu þar ofan á
Setjið svo grænmeti og döðlur með því að rífa þær í tvennt út á og passið að taka steininn úr ef þær eru ferskar
Setjið svo fetaost eða þess vegna ferskan mozzarella-ost út á, ólífurnar og síðast sósuna
Gott er að hafa svo sósu til hliðar á disknum til að dýfa í
Einnig er mjög gott að loka kökunni og setja sósu ofan á samskeytin og smá ólífuolíu yfir og kryddjurtir
Mæli með að borða það þá með hníf og gaffli