Er eldhús- eða borðstofuborðið þitt orðið lúið og þreytt og kallar á ástríka hönd? Það er algjör óþarfi að stökkva út í búð og kaupa nýtt þegar þú getur uppfært það gamla á einfaldan máta.

Það finnast óteljandi falleg borð á markaðnum í dag og mörg þeirra með línoleumyfirborði í ýmsum litatónum. Línoleum er algjörlega tímalaust og er mikið notað á eldhúsborð og skrifborð, einfaldlega vegna þess hversu endingargott það er – en jafnframt mjúkt efni sem getur haldið sér í langan tíma.

Þú kaupir línoleum í metravís og getur límt það á gamalt borð sem þarf að flíkka upp á eða önnur húsgögn. Passið bara að línoleumið sé litað í gegn til að kantarnir séu í sama lit og platan sjálf.

Það sem til þarf:

• Borðplata
• lím (trélím eða línoleumlím)
• rúlla fyrir límið
• beittur hnífur
• sandpappír
• þungir hlutir til að pressa borðplötuna niður

Aðferð:

1. Rúllið líminu á borðplötuna og á línoleumrenninginn – sjáið til þess að renningurinn sé örlítið stærri en borðplatan sjálf.
2. Pressið renningnum á borðplötuna og byrjið fyrir miðju. Vinnið ykkur út í kantana svo að loftbólur og aukalím nái að pressast burt.
3. Veltið borðinu á hvolf þannig að nýja borðplatan liggi á gólfinu. Leggið þungar bækur eða annað á til að borðplatan pressist örugglega vel saman.
4. Skerið í lokin línoleumplötuna til eftir borðplötunni og pússið kantana mjúka með sandpappír.