Baka með stökkum botni, beikoni og karamellulauk

Botn:

• 200 g hveiti
• 1 tsk. salt
• 100 g kalt smjör
• 4 msk. ískalt vatn
• Tertuform, sirka 25 cm

Fylling:

• 100 g beikon í bitum
• 500 g blandaðir sveppir
• 2 rauðlaukar
• 1 msk. ólífuolía
• 2 msk. balsamikedik

Eggjamassi:

• 3 egg
• 3 msk. sýrður rjómi, 18%
• 1 msk. ferskt timían, saxað
• Salt og pipar

Aðferð:

Botn:

1. Blandið hveiti og salti saman í skál. Skerið smjörið í teninga og smuldrið því út í hveitið. Bætið ísköldu vatni út í og blandið saman með gaffli (bætið við vatni ef það er ekki nóg). Hnoðið deiginu saman á borðplötu og pakkið því síðan inn í plastfilmu – setjið í kæli í 30 mínútur.
2. Fletjið tertudeiginu út með kökukefli á hveitistráðu borði og leggið í tertuformið, munið að fara upp með hliðunum. Stingið göt í botninn með gaffli og bakið í ofni í 10 mínútur.

Fylling:

1. Steikið beikonið á þurri pönnu og setjið á eldhúsrúllu til að leyfa fitunni að leka af.
2. Skerið sveppina í skífur og steikið þá upp úr beikonfitunni á pönnu þar til þeir byrja að taka lit.
3. Skerið rauðlaukinn í þunnar ræmur og steikið á pönnunni, bætið jafnvel smá olíu út á. Setjið balsamik edik út á pönnuna rétt áður en rauðlaukurinn byrjar að brúnast og veltið þar til vökvinn hefur gufað upp.

Eggjamassi:

1. Pískið egg, sýrðan rjóma og smátt saxað timían saman, saltið og piprið. Dreifið blöndunni yfir forbakaða tertubotninn.
2. Toppið með sveppum, beikonbitum og karamellulauk. Bakið í 30 mínútur þar til eggjamassinn hefur tekið sig „fastan“ og botninn orðinn stökkur og gylltur.
3. Skreytið með timían og berið fram.