Nýjasta vörulína Kodanska heldur áfram að stækka - og nú með enn fleiri litríkum glervörum sem gleðja augað.

Fyrir þá sem ekki til þekkja er Kodanska danskt fyrirtæki í eigu Marie Graff, sem framleiðir fallegar gler- og keramíkvörur. Nafnið „Kodanska“ þýðir í raun Kaupmannahafnargata á tékknesku og má finna götuna í borginni Prag. Þess má geta að Marie bjó í áraraðir með fjölskyldu sinni þar í borg og fékk þaðan hugmyndina að fyrirtækinu. Kodanska framleiðir tímalausa hluti fyrir heimilið með áherslu á gæði og fagurfræði.

Nýjungarnar sem við fáum hér að sjá eru viðbót við FLOW-vörulínuna sem hefur fengið mikið lof. Hér eru litríkar karöflur í mjúkum formum, listrænir vasar og úrval af litlum og stórum glösum í tærum litum. Með nýjungunum mun matarborðið fljótt fyllast af litum og persónuleika sem gestir munu heillast af.