Matur | mbl | 27.8.2021 | 12:06

Rjómalagað pasta með leynihráefni sem kemur á óvart

Ljósmynd/Helena Gunnarsdóttir

Bragðgóður og öðruvísi pastaréttur sem kemur skemmtilega á óvart, svo ekki sé meira sagt! Sósan er látin bullsjóða svo áfengið sýður að mestu leyti í burtu en eftir stendur spennandi undirtónn eða keimur sem gefur réttinum nýstárlegt bragð.

Höfundur þessar uppskriftar er Helena Gunnarsdóttir sem gefur þessari uppskrift ótvíræðan gæðastimpil.

Rjómalagað vodka pasta

3 skammtar
300 g pasta, t.d. penne eða rigatoni
2 msk. smjör
1 stk. lítill laukur, smátt saxaður
2 stk. hvítlauksrif, smátt söxuð
1 dl vodka
1 dós hakkaðir tómatar
2 msk. tómatpúrra
250 ml rjómi frá Gott í matinn
rifinn Óðals Tindur eftir smekk
salt, pipar og chili flögur, eftir smekk
fersk basilíka, má sleppa

Aðferð:

Sjóðið pastað eftir leiðbeiningum á pakka.
Bræðið smjör á pönnu og steikið lauk og hvítlauk þar til mýkist.
Kryddið með salti, pipar og chilliflögum.
Hækkið hitann og hellið vodkanu yfir, leyfið að sjóða í 1-2 mínútur.
Bætið þá tómatmaukinu og tómatpúrrunni út á ásamt rjómanum.
Leyfið að malla í 5 mínútur þar til þykknar aðeins og smakkið til með salti, pipar og chiliflögum.
Bætið soðnu pastanu út á pönnuna og blandið vel saman.
Toppið með vel af rifnum Óðals Tindi og e.t.v. ferskri basilíku.
Berið fram strax með rifnum Óðals Tindi.