Matur | mbl | 17.10.2022 | 11:01

Kósírétturinn sem hittir í mark

Ljósmynd/Berglind Hreiðarsdóttir

„Ég var að prófa gnocchi í fyrsta skipti og ætla ég alveg að segja að ég var smá skeptísk á þetta í upphafi þar sem þetta er aðeins önnur áferð en á venjulegu pasta,“ segir Berglind Hreiðarsdóttir á Gotteri.is um þessa uppskrift sem við köllum hinn fullkomna kósímat.

„Gnocchi er þéttara í sér og stífara undir tönn en almáttugur þessi baka var undursamleg og virkilega gaman að prófa að breyta aðeins út af vananum með hefðbundið pasta!“

Gnocchi-baka

Fyrir 4-6

3 kjúklingabringur frá Rose Poultry
300 g frosið rósakál
200 g kastaníusveppir
3 hvítlauksrif
1 pakki DeCecco-gnocchi (500 g)
350 ml rjómi
200 g Philadelpia-rjómaostur
100 g rifinn Primadonna/Grettir ostur
ólífuolía til steikingar
sítrónusneiðar til skrauts
smjör til steikingar
salt, pipar, hvítlauksduft, kjúklingakrydd, cheyennepipar

Aðferð:

Hitið ofninn í 180°C.
Skerið kjúklingabringurnar í tvennt, langsum svo úr verði sex einingar.
Sjóðið rósakálið í átta mínútur og hellið í sigti, leyfið vatninu að leka vel af.
Steikið kjúklinginn upp úr olíu til að loka bringunum og brúna allar hliðar. Kryddið eftir smekk, leggið í eldfast mót.
Sneiðið sveppina, bætið smjöri á pönnuna og steikið þá við meðalháan hita og kryddið eftir smekk þar til þeir fara að mýkjast. Setjið þá hvítlaukinn saman við síðustu mínútuna og bætið sveppunum næst í fatið með kjúklingnum.
Bætið aftur smjöri og olíu á pönnuna og steikið næst rósakálið, kryddið eftir smekk og bætið því síðan við í eldfasta mótið.
Sjóðið þá gnocchi á eftir rósakálinu (í tvær mínútur), sigtið vatnið af og bætið næst í eldfasta mótið.
Næst má gera sósuna með því að hella rjómanum á pönnuna, rífa ostinn og bæta rjómaostinum saman við. Hrærið við meðalháan hita þar til jöfn sósa myndast og kryddið eftir smekk.
Hellið sósunni yfir allt í fatinu, blandið létt saman, skreytið með sítrónusneiðum og setjið í ofninn í 25 mínútur. Gott er að hafa álpappír yfir fyrstu 15 mínúturnar og taka hann síðan af í lokin.
Rífið meiri Primadonnu/Gretti-ost yfir ef þess er óskað.