Matur | mbl | 25.2.2023 | 12:08

Svona getið þið sparað háar fjárhæðir

Ljósmynd/Berglind Hreiðarsdóttir

Bragðarefur er í uppáhaldi hjá mörgum en hann er langt frá því að vera ódýr. Hvað þá ef öll fjölskyldan ætlar að fá sér einn – þá hleypur kostnaðurinn á þúsundum. Hér er hins vegar uppskrift sem vert er að lesa ef þið eruð sólgin í ís.

„Ég og við reyndar öll hér í fjölskyldunni elskum bragðaref! Það er fátt betra á kósýkvöldum en það að útbúa sjeik, sækja sér bragðaref eða eitthvað í þeim dúr. Að útbúa bragðaref heima er síðan algjör snilld, ég tala nú síðan ekki um hvað það er margfalt ódýrara en að kíkja í ísbúðina!“ segir Berglind Hreiðars á Gotteri.is um þennan snilldar bragðaref sem hún segir að sé svakalega góður.

„Ég á alltaf smá erfitt með of stóra frosna jarðarberjabita svo mér finnst best að stappa jarðarberin. Síðan vill ég alltaf saxa nammið frekar smátt og þessu öllu er auðvitað miklu betra að stýra heiman frá sér.“

Pandarefur uppskrift

2-3 glös eftir stærð

1 ½ l vanilluís
150 g jarðarber
70 g Pandakúlur með jarðarberjabragði
70 g Pandakúlur með saltkaramellubragði
40 g karamellukurl frá Nóa Siríus
4 msk. þykk karamellusósa

Aðferð:

Skerið eða stappið niður jarðarberin og saxið Pandakúlurnar smátt niður.
Setjið ísinn í hrærivélina og hrærið á lágum hraða með K-inu.
Bætið jarðarberjum, söxuðum Pandakúlum og karamellukurli saman við.
Slökkvið þá á hrærivélinni, bætið karamellusósunni létt saman við með sleikju (ég keypti tilbúna heita karamellusósu en hitaði hana ekki, sprautaði bara beint úr flöskunni).
Skiptið niður í glös, toppið með smá Pandakúlum, karamellusósu, karamellukurli og njótið.
Það má einnig setja blönduna í skál og geyma í frysti í 1-2 klukkustundir áður en þið njótið. Ef þið gerið það er sniðugt að hræra nokkrum sinnum í blöndunni á meðan til að hún haldist „mjúk“ en samt frosin.