Blómkálsmús er einstaklega góð með sjávarfangi, eins og hörpuskel, saltfiski og þorskhnökkum auk þess steinliggur hún með önd svo fátt sé nefnt. Síðan er svo gaman að framreiða hana á fallegan hátt.
Þetta er uppáhaldsútgáfan mín að blómkálsmúsinni og hráefnalistinn er stuttur og laggóður.
Syndsamlega blómkálsmúsin
Fyrir 3-4
- 25 g smjör
- 1 lítinn blómkálshaus, skorinn í bita
- 200 ml mjólk
- 100 ml matreiðslurjómi eða venjulegur rjómi
- Salt og pipar eftir smekk
Aðferð:
- Byrjið á því að bræða smjör í potti á vægum hita, gott að vera með smjörið í bitum/kubbum.
- Bætið blómkálsbitunum út í og hrærið og steikið í 2-3 mínútur eða þar til blómkálið hefur tekið á sig lit.
- Setjið mjólk og rjóma út í, kryddið til með salti og pipar eftir smekk og hitið að suðu.
- Sjóðið í um það bil 10 mínútur við miðlungs hita eða þar til blómkálið verður mjúkt.
- Sigtið þá vökvann frá og setjið blómkálsbitana í blandara eða matvinnsluvél og maukið þar til blandan verður orðin kekkjalaus.
- Bragðbætið með salt og pipar ef vill.
- Berið fram með því sem hugurinn girnist. Það er í góðu lagi að skreyta músin með ferskum kryddjurtum eða því sem lokkar augu og munn.