Matur | mbl | 22.11.2024 | 12:05

Vanillukransarnir bráðna í munni og fylla heimilið af ilm

Vanillukransar eru fullkomnir fyrir jólakaffið og veita dásamlega upplifun þegar þeir bráðna í munni. mbl.is/Eyþór Árnason

Árni Þorvarðarson bakari og fagstjóri við Hótel- og matvælaskólann í Kópavogi fagnar ávallt þegar aðventan gengur í garð. Hann nýtur þess að eiga góða samverustundir með fjölskyldunni og baka jólasmákökur sem rifja upp æskuminningarnar um gömlu, góðu tímanna.

Hann deilir að þessu sinni uppskrift af vanillukrönsum sem honum finnst vera ómissandi að baka fyrir hátíðirnar með sínu fólki.

Vanilluilmur sem kallar fram hlýjar minningar

„Vanillukransar hafa lengi verið klassískur hluti af jólabakstrinum og gleðja jafnt börn sem fullorðna. Það er eitthvað töfrandi við að nota hakkavél eða sprautupoka til að móta þessa litlu kransa, og þegar þeir koma heitir úr ofninum og bráðna í munni, fyllist heimilið af ljúfum vanilluilm sem kallar fram hlýjar minningar,“ segir Árni með bros á vör.

Árni Þorvarðarson nýtur þess að baka jólasmákökur með sínu fólki og rifja upp fallegar jólaminningar um bernskuna. mbl.is/Eyþór Árnason

Vanillukransar eru fullkomnir fyrir jólakaffið og veita dásamlega upplifun þegar þeir bráðna í munni. Það að baka vanillukransa saman er hefð gaman er að taka upp ef hún er ekki þegar til staðar. Þetta er hefð er viðhöfð á mörgum heimilum sem tengir kynslóðir saman og býr til minningar sem fylgja fjölskyldunni um ókomin ár.

Vanillukransar

80 g flórsykur
155 g smjörlíki, við stofuhita
2 lítil egg (70 ml)
235 g hveiti
2 tsk. vanillusykur
Smá salt

Aðferð:

Hitið ofninn í 210°C og leggið bökunarpappír á bökunarplötu.
Þeytið saman smjör og flórsykur þar til blandan verður létt og loftkennd.
Bætið eggi, vanillu og salti út í smjörblönduna og hrærið þar til allt er vel blandað.
Bætið hveitinu út í og hnoðið deigið þar til það verður mjúkt og jafnt.
Notið hakkavél eða sprautupoka með stórum stút til að sprauta út litla hringi á bökunarplötuna.
Bakið í 8-10 mínútur eða þar til kransarnir eru fallega gylltir á köntunum.
Látið kransana kólna á plötunni áður en þið flytjið þá yfir á grind.
Geymið í fallegu jólakökuboxi klæddu bökunarpappír þegar til þið bjóðið upp á dýrðina með aðventukaffinu.