Hver er fyrirmyndin þín í hlutverki ritstjóra Pressunnar í samnefndum spennuþætti?  "Ég veit að Óskar vildi blanda Mikael Torfasyni og Páli Baldvini saman í ritstjórann. Ég held að það hafi verið pælingin," svarar Kjartan Guðjónsson leikari sem fer á kostum í Pressunni sem sýnd er á Stöð2. "Ég veit hver Páll Baldvin er en hef aldrei hitt Mikael Torfason. Sigurjón Kjartans sagði að ætti að vera með lappirnar uppá borði eins og ritstjórar gera. Það var mjög gaman í tökunum. Þorsteinn Backmann og ég áttum mjög erfitt með okkur fyrstu dagana því við höfðum ekki leikið samam í 10 ár og vorum alltaf að djóka og losa um á milli þess sem tökur fóru fram með bröndurum þannig að Óskar var farinn að áminna okkur tvo því við áttum að vera alvarlegir."

Ertu með plan B til aðkomast áfram í úrslit Eurovision? "Nei það er ekki hægt að gera einhver plön í þessu. Þjóðin ræður, ég ræð engu. Ég veit þó að Dr. Spock mun standa sig æðislega svo ég kvíði engu," svarar eðalnáunginn og lagahöfundurinn Dr. Gunni. 

Hvað tákna gúmmíhanskarnir hjá Dr. Spock? "Hina eilífa æsku rokksins. Eða kannski ekki. Málið með hanskana er að Finni söngvari var víst í samkvæmi fyrir einhverja tónleika með bandinu og mætti vel við skál og hafði sett á sig gulan hanska á leiðinni. Hinir strákarnir gripu þetta á lofti, enda er hanskinn einfalt en eftirminnilegt rokktrix. Síðan hefur hönskunum fjölgað og eru orðnir órjúfanlegur hluti af ímynd bandsins. Það var gulur hanski á fyrstu plötunni og bleikur á þeirri næstu. Nú eru strákarnir að vinna nýja plötu svo það hlýtur að koma grænn hanski næst."

Á heimasíðu Dr. Gunna http://this.is/drgunni/ skrifar hann eftirfarandi:

Þrautarganga mín í forvali Eurovision, aka Laugardagslögunum, hefur verið framlengd því Dr. Spock með Hvar ertu nú? keppir á móti Fabúlu og Hafdísi Huld næsta laugardag í sérstökum aukaþætti. Aðeins eitt af þessum þremur lögum fer áfram og bætist í haug laganna sem þá verða orðin 12. Það er því bráðnauðsynlegt að hringja og hringja, enda fátt meira upplagt en að eyða hundrað köllunum sínum í svona. (Hér má hlusta á snilldina og hér má sjá hana.) 

"Ég er með sjö mismunandi námskeið sem ég býð uppá í vor en kjölfestan í dagskránni hjá mér er námskeiðið "Þú ert það sem þú hugsar" sem ég byrjaði með haust 2006 og gaf út samnefnda bók," svarar Guðjón Bergmann fyrirlesari, rithöfundur og jógakennari. "Ég tala um hverju við getum stjórnað og hverju ekki þegar kemur að hugsunum okkar. Segjum svo að þú kýst að vera jákvæðari en veist ekki hvað skal gera. Ég tala til dæmis um muninn á slökun og leti og legg áherslu á ákveðnar hugarfarsbreytingar, meira sjálfstraust og minni streitu. Ég prófaði að búa til streitulaust líf og það varð hundleiðinlegt. Það var ekkert spennandi." 

Heimasíða Guðjóns gbergmann.is

Arndís Hrönn Egilsdóttir leikkona er sannfærandi í hlutverki Stínu blaðakonu í sakamálaþættinum Pressu sem sýndur er á Stöð2. Hringdi í leikkonuna og spurði hvernig hún undirbjó sig fyrir hlutverkið: "Ég fékk línur um það að hún ætti að vera ópjöttuð og bara töffari og nó búllshit manneskja. Hún er ekkert mikið að velta sér upp úr útlitinu og er straight forward. "

"Ég leitaði í svoleiðis týpur og notaði líka eitthvað frá sjálfri mér þó ég sé ekki mikið hörkutól eða svona fúl. Óskar var með ákveðna týpu í huga sem er aðeins lifuð og smá reykingalykt í röddinni hennar," segir Arndís og bætir við að hún hafi unnið með frábærum leikurum. "Það var mjög góð stemming í hópnum og mikill fókus."

Arndís leikur um þessar mundir í söngleiknum Hér og nú í Borgarleikhúsinu.

"Ég er mjög spenntur á að takast á við nýjan starfsvettvang og að geta víkkað umfjöllun um Formúlu 1 til muna. Það verða margar spennandi nýjungar á Sýn, sem verið er að leggja grunn að þessa dagana", segir Gunnlaugur Rögnvaldsson sem sér framvegis um beinar útsendingar frá Formúlu 1 kappakstrinum á Sjónvarpsstöðinni SÝN.

"Ég hef gengið með ýmsar hugmyndir í maganum sem ekki hefur verið hægt að útfæra til þessa á Íslandi, en það er hugur í Sýnar-mönnum. Við munum heimsækja ökumenn, lið og mótsstaði á árinu og kynda hressilega undir byrjun tímabilsins með þáttum um undirbúning keppnisliða fyrir tímabilið. Taka púlsinn og vera á staðnum. Þá stendur til að virkja áhorfendur meira í umfjöllun um Formúlu 1 og skapa stemmningu þar að lútandi um land allt með gestum í sjónvarpssal, viðtölum út á landi og leikjum ýmis konar. Ég lýsi hér með eftir áhugasömum börnum,unglingum, konum og körlum til að taka þátt í herlegheitunum", segir Gunnlaugur.

Útsendingarnar á Sýn verða í náinni samvinnu við vefsetrið www.kappakstur.is, sem verður sérstakur útsendingarvefur Formúlu 1 hérlendis.