Þrír af fjórum liðsmönnum Fellaskóla í Skólahreysti kepptu fyrir skólann í fyrra. Þá komst skólinn reyndar ekki í úrslit en liðið er reynslunni ríkara og tókst að koma Fellaskóla í úrslit Skólahreysti í fyrsta skipti. Reyndar nokkuð örugglega eftir að hafa unnið Austurlandsriðilinn.

Úrslitakeppnin í Skólahreysti fer fram í Laugardalshöll föstudaginn 16. maí næstkomandi. Af því tilefni kynnir Monitor öll liðin sem keppa. Þrjú lið verða kynnt á degi hverjum, fram á föstudag. Að þessu sinni kynnumst við liði Fellaskóla.

Lið Fellaskóla skipa þau Þuríður Nótt Björgvinsdóttir, Ásta Evlalía Hrafnkelsdóttir, Elías Jökull Elíasson og Hjálmar Óli Jóhannsson. Sá eini sem ekki hefur keppt áður í Skólahreysti er Hjálmar Óli sem raunar væri ekki gjaldgengur í fjölmennari skóla, en hann er í 8. bekk. Keppnin er ætluð nemendum í 9. og 10. bekk en fámennir skólar fá undanþágu til að velja nemendur úr 8. bekk í liðið ef enginn er til að keppa í eldri bekkjunum.

Keppendur skipta á milli sín keppnisgreinum. Hjálmar Óli spreytir sig á upphífingum og dýfum meðan Elías Jökull keppir í hraðaþrautinni. Hjá stelpunum er hið sama uppi á teningnum: Ásta Evlalía keppir í armbeygjum og hreystigreip, en Þuríður Nótt tekur þátt í hraðaþrautinni.

Skólahreysti

• Skólahreysti er liðakeppni milli grunnskóla landsins.
• Skólahreysti byrjaði árið 2005 með þátttöku sex skóla. Í ár voru um 110 grunnskólar af öllu landinu sem tóku þátt.
• Úrslitakeppni þeirra tólf skóla sem náðu bestum árangri í undankeppninni fer fram föstudaginn 16. maí næstkomandi.
• Keppnisgreinarnar eru upphífingar, armbeygjur, dýfur, hreystigreip og hraðaþraut.

Tengdar fréttir

Skólahreysti

Heiðarskóli sigraði með hálfu stigi

• Íslandsmetið slegið degi eftir að það var sett
• Hékk í rúmt korter og sló Íslandsmet
• Erfitt að spá fyrir um úrslitin
• Skólahreysti yfirtekur Reykjanesbæ

» Fleiri tengdar fréttir

• Blogga um frétt