Jón Ásgeir Jóhannesson athafnamaður fagnaði 50 ára afmæli sínu 27. janúar. Á föstudagskvöldið hélt fólkið hans óvænta veislu fyrir hann. Afmælið var haldið við Hverfisgötu í Reykjavík eða í sama húsi og 101 Hótel, en gengið er inn í húsnæðið í portinu við Stjórnarráðið. 

Afmælisbarnið sjálft, sem varð 50 ára 27. janúar, hafði ekki hugmynd um veisluna en þegar hann mætti um kl. 20.00 um kvöldið voru vinir hans og fjölskylda samankomin til að fagna honum og þessum stóra áfanga. Meðal gesta voru Þorsteinn M. Jónsson, oft kenndur við Kók, Tryggvi Jónsson og Pálmi Haraldsson svo einhverjir séu nefndir. 

Þótt flott tónlistaratriði væru í boði í afmælinu var enginn tryllingur í gangi. Afmælið var til dæmis mun lágstemmdara en brúðkaup Jóns Ásgeirs og Ingibjargar sem fram fór í nóvember 2007. Þá var um 300 manns boðið í Fríkirkjuna í Reykjavík og var glæsileg veisla haldin í Hafnarhúsinu þar sem erlendir aðilar voru kallaðir til, til að skreyta salinn svo dæmi sé tekið. 

Jón Ásgeir er mikill aðdáandi Björns Jörundar og Ný danskrar og spilaði Björn Jörundur í afmælinu, en þar var líka Bubbi Morthens og rokkhljómsveitin Dimma og hljómsveitin Babies sem samanstendur af fimm stuðboltum, þeim Ingimundi og Ísaki Erni Guðmundssonum, Ingibjörgu Elsu Turchi, Magnúsi Magnússyni og Zakaríasi Herman Gunnarssyni. Sveitin sérhæfir sig í helstu hitturum níunda áratugarins og þykir góð í að skapa frábæra stemningu.

Smartland óskar Jóni Ásgeiri til hamingju með afmælið.