Aron Einar Gunnarsson og Kristbjörg Jónasdóttir lentu illa í íslenskum fjárfesti sem tengist fyrirtækinu JÖR.

Í bókinni Aron - Sagan mín, sem kom út í vikunni hjá útgáfunni Fullt tungl, kemur fram að vinslit hafi orðið milli Arons Einars og Kristbjargar annars vegar og Björns Inga Hrafnssonar og Kolfinnu Vonar Arnardóttur hins vegar.

Urðu vinslitin vegna viðskipta sem fóru í vaskinn en í bókinni segir Aron Einar frá því að þau hafi lagt peninga inn í fyrirtækið. Málið hafi endað með vinslitum og málaferlum. 

Í bókinni segir: 

„Ég átti þó eftir að brenna mig aftur. Árið 216 stakk besta vinkona Kristbjargar upp á því að við færum í viðskipti með henni og eiginmanni hennar, sem er virkur fjárfestir á Íslandi. Við treystum þeim og ákváðum því að kaupa hlut í félagi þeirra undir þeim formerkjum að til stæði að fjárfesta í íslensku fatavörumerkinu JÖR. Að lokum sigldi það í strand, ekkert varð af fjárfestingunni, svo við sömdum um að félagið myndi einfallega kaupa hlutinn aftur af okkur. Þrátt fyrir það höfðum við Kristbjörg hvorki fengið greitt til baka samkvæmt samningnum né fengið að sjá pappíra til útskýringar á hvað varð um peningana. Þau hafa aldrei getað útskýrt það. Samstarfið endaði í raun eins illa og það hefði getað, ekki bara með árangurslítilli innheimtu og málaferlum heldur einnig með vinslitum. Þetta var og er leiðindamál sem sýnir manni hvað er raunverulega lagt að veði þegar vinir fara saman út í viðskipti,“ segir Aron Einar í síðu 58 í bók sinni.