Íþróttir | Íslenski fótboltinn | mbl | 14.7.2023 | 7:30 | Uppfært 11:27

14. umferð: Leikjamet jafnað, markamet jafnað, fyrstur í 40

Haukur Páll Sigurðsson jafnaði metið hjá Val í leiknum við Fylki. Ljósmynd/Kristín Hallgrímsdóttir.

Haukur Páll Sigurðsson jafnaði leikjamet Vals í efstu deild þegar hann kom inn á hjá Hlíðarendaliðinu í sigrinum á Fylki, 2:1, í fyrrakvöld.

Þetta var hans 244. leikur fyrir félagið í deildinni og með því jafnaði Haukur Páll við Bjarna Ólaf Eiríksson sem lék 244 leiki með Val í efstu deild.

Haukur Páll fór fyrr í sumar einnig fram úr Sigurbirni Hreiðarssyni, fyrrverandi methafa, sem nú er þriðji leikjahæstur með 240 leiki. Aðeins fimm leikmenn hafa leikið fleiri leiki fyrir eitt félag í deildinni en þeir Haukur Páll og Bjarni Ólafur.

Alls hefur Haukur Páll leikið 279 leiki í efstu deild með Val og Þrótti og hann er nú sjöundi leikjahæsti leikmaður deildarinnar frá upphafi.

Atli Arnarson jafnaði markamet HK. mbl.is/Eggert Jóhannesson.

Atli Arnarson jafnaði markamet HK í efstu deild þegar hann jafnaði fyrir liðið, 1:1, undir lok leiksins gegn KR í Kórnum í gærkvöld. Þetta var 12. mark Atla fyrir HK í deildinni en áður höfðu þeir Birnir Snær Ingason, núverandi leikmaður Víkings, og Arnþór Ari Atlason skorað 12 mörk fyrir félagið í efstu deild.

Arnór Sveinn Aðalsteinsson skoraði sitt fyrsta deildarmark fyrir Breiðablik í átta ár þegar hann kom Kópavogsliðinu í 4:1 í sigrinum á Fylki síðasta föstudagskvöld, 5:1. Arnór fór frá Breiðabliki í KR árið 2017 og sneri aftur í Kópavoginn í vetur.

Arnar Smári Arnarsson, Atli Þór Gunnarsson og Ásgeir Helgi Orrason komu inn á sem varamenn hjá Breiðabliki gegn Fylki og spiluðu allir sinn fyrsta leik í efstu deild.

Úkraínski varnarmaðurinn Oleksiy Kovtun skoraði sitt fyrsta mark í deildinni þegar Keflavík gerði jafntefli við Víking, 3:3, á laugardaginn. Þetta var tíundi leikur Kovtuns í deildinni.

Nikolaj Hansen - 40 mörk fyrir Víking. Ljósmynd/Kristín Hallgrímsdóttir.

Þegar Nikolaj Hansen jafnaði metin fyrir Víking gegn Keflavík í uppbótartíma, 3:3, með sínu öðru marki í leiknum varð hann fyrstur til að skora 40 mörk fyrir Víking í efstu deild. Fyrr í sumar sló hann markamet Heimis Karlssonar fyrir félagið í deildinni, sem var 37 mörk.

Úrslitin í 14. umferð:
Breiðablik - Fylkir 5:1 (tilheyrði 17. umferð)
ÍBV - Fram 1:0
Keflavík - Víkingur R. 3:3
Valur - Fylkir 2:1
HK - KR 1:1

Markahæstir í deildinni:

10 Stefán Ingi Sigurðarson, Breiðabliki
8 Adam Ægir Pálsson, Val
8 Tryggvi Hrafn Haraldsson, Val
7 Fred Saraiva, Fram
7 Gísli Eyjólfsson, Breiðabliki
7 Nikolaj Hansen, Víkingi
6 Aron Jóhannsson, Val
6 Birnir Snær Ingason, Víkingi
6 Guðmundur Magnússon, Fram
6 Ísak Andri Sigurgeirsson, Stjörnunni
6 Kjartan Henry Finnbogason, FH
6 Úlfur Ágúst Björnsson, FH
6 Örvar Eggertsson, HK
5 Benedikt Daríus Garðarsson, Fylki
5 Danijel Dejan Djuric, Víkingi
4 Andri Rúnar Bjarnason, Val
4 Arnþór Ari Atlason, HK
4 Emil Atlason, Stjörnunni
4 Ólafur Karl Finsen, Fylki
4 Óskar Borgþórsson, Fylki