Íþróttir | Íslenski fótboltinn | mbl | 25.7.2023 | 7:50 | Uppfært 10:32

16. umferð: Guðmundur 350 og Patrick 90

Guðmundur Kristjánsson hefur leikið 350 deildaleiki á ferlinum.

Guðmundur Kristjánsson, fyrirliði Stjörnunnar, náði þeim áfanga á sunnudagskvöldið að spila sinn 350. deildaleik á ferlinum þegar Garðabæjarliðið gerði jafntefli, 1:1, við HK í Kórnum í 16. umferð Bestu deildar karla í fótbolta.

Af þessum leikjum Guðmundar eru 196 í efstu deild hér á landi, síðustu 14 fyrir Stjörnuna en áður 80 fyrir Breiðablik og 102 fyrir FH. Hann lék 148 deildaleiki fyrir Start í Noregi, þar af 100 í efstu deild og 48 í B-deild. Þá lék Guðmundur sex leiki með Haukum í 1. deildinni sem lánsmaður í byrjun ferilsins.

Patrick Pedersen skoraði sitt 90. mark í efstu deild þegar hann tryggði Val sigur á Fram, 1:0, á sunnudagskvöldið. Hann er aðeins áttundi leikmaðurinn í sögu deildarinnar sem nær þessum markafjölda en öll mörkin hefur hann skorað fyrir Val.

Patrick Pedersen er áttundi leikmaðurinn sem skorar 90 mörk í efstu deild karla. Ljósmynd/Kristín Hallgrímsdóttir

Bjarni Aðalsteinsson hafði skorað eitt mark í 62 leikjum fyrir KA í efstu deild fyrir þetta tímabil. Eftir að hafa skorað tvívegis í sigri liðsins í Keflavík í gærkvöld, 4:3, er Bjarni nú markahæsti leikmaður KA í deildinni á tímabilinu með fjögur mörk.

Ásgeir Páll Magnússon úr Keflavík skoraði sitt fyrsta mark í efstu deild í leiknum gegn KA, í sínum 25. leik.

Ómar Björn Stefánsson skoraði sitt fyrsta mark í deildinni fyrir Fylki í sigri liðsins gegn FH í Kaplakrika í gærkvöld, 4:2. Þetta var hans 10. leikur í deildinni.

Kristófer Jónsson úr Val og Egill Otti Vilhjálmsson léku báðir sinn fyrsta leik í efstu deild þegar liðin mættust á Hlíðarenda.

Ísak Daði Ívarsson úr Keflavík lék sinn fyrsta leik í deildinni gegn KA en hann er í láni frá Víkingi.

Fylkir hefur unnið báða leiki sína gegn FH á tímabilinu með sömu markatölu, 4:2. Fylkir hefur því skorað næstum þriðjung marka sinna í ár hjá Hafnarfjarðarliðinu.

Úrslitin í 16. umferð:
Breiðablik – ÍBV 3:1
Valur – Fram 1:0
HK – Stjarnan 1:1
KR – Víkingur R. 1:2
Keflavík – KA 3:4
FH – Fylkir 2:4

Markahæstir í deildinni:

10 Stefán Ingi Sigurðarson, Breiðabliki
8 Adam Ægir Pálsson, Val
8 Tryggvi Hrafn Haraldsson, Val
7 Fred Saraiva, Fram
7 Gísli Eyjólfsson, Breiðabliki
7 Nikolaj Hansen, Víkingi
6 Aron Jóhannsson, Val
6 Benedikt Daríus Garðarsson, Fylki
6 Birnir Snær Ingason, Víkingi
6 Guðmundur Magnússon, Fram
6 Ísak Andri Sigurgeirsson, Stjörnunni
6 Kjartan Henry Finnbogason, FH
6 Úlfur Ágúst Björnsson, FH
6 Örvar Eggertsson, HK
5 Danijel Dejan Djuric, Víkingi
5 Óskar Borgþórsson, Fylki
4 Andri Rúnar Bjarnason, Val
4 Arnþór Ari Atlason, HK
4 Atli Hrafn Andrason, HK
4 Bjarni Aðalsteinsson, KA
4 Eggert Aron Guðmundsson, Stjörnunni
4 Emil Atlason, Stjörnunni
4 Hermann Þór Ragnarsson, ÍBV
4 Klæmint Olsen, Breiðabliki
4 Ólafur Karl Finsen, Fylki