Íþróttir | Íslenski fótboltinn | mbl | 1.8.2023 | 7:30 | Uppfært 12:59

17. umferð: Leikjametið féll

Haukur Páll Sigurðsson hefur leikið 245 leiki í deildinni fyrir Val og 280 alls. Ljósmynd/Kristinn Steinn

Haukur Páll Sigurðsson er orðinn leikjahæsti Valsmaðurinn í efstu deild karla í fótbolta frá upphafi.

Haukur Páll sló leikjametið í gærkvöld þegar hann kom inn á sem varamaður í sigri Valsmanna á KR í Vesturbænum, 4:0. Hann lék sinn 245. leik fyrir félagið í deildinni og þar með féll metið sem Bjarni Ólafur Eiríksson átti, 244 leikir. Um leið lék Haukur sinn 280. leik samtals í deildinni og hann er aðeins sjöundi leikmaður deildarinnar frá upphafi sem nær þeim leikjafjölda.

Daníel Laxdal er orðinn fimmti leikjahæstur í deildinni. mbl.is/Eggert Jóhannesson

Daníel Laxdal er einn af þeim sex sem hafa leikið fleiri leiki en Haukur Páll og hann komst einmitt upp í fimmta sætið á þeim lista á laugardaginn þegar Stjarnan gerði jafntefli við Breiðablik, 1:1. Daníel hefur leikið 286 leiki í deildinni, alla fyrir Stjörnuna, og fór upp fyrir Atla Guðnason sem er nú sjötti með 285 leiki. Daníel á möguleika á að ná fjórða sæti á þessu tímabili.

Andri Rafn Yeoman úr Breiðabliki er skammt á eftir þeim og hann varð í leiknum við Stjörnuna tíundi leikmaðurinn frá upphafi til að spila 270 leiki í deildinni.

Björn Daníel Sverrisson skoraði sitt 40. mark í deildinni og bætti við því 41. Ljósmynd/Kristín Hallgrímsdóttir

Björn Daníel Sverrisson skoraði sitt 40. mark í efstu deild hér á landi í gærkvöld, fyrra mark sitt af tveimur, þegar FH vann Keflavík, 3:2, í gærkvöld. Hann er sjöundi leikmaðurinn sem nær 40 mörkum fyrir FH í deildinni. Þá varð Björn í gærkvöld fimmti leikjahæstur hjá FH í deildinni en hann lék sinn 202. leik og fór upp fyrir Frey Bjarnason.

Færeyingurinn Jóan Símun Edmundsson úr KA og Úkraínumaðurinn Robert Hehedosh úr Keflavík léku báðir sinn fyrsta leik í efstu deild hér á landi í 17. umferðinni.

Úrslitin í 17. umferð:
Stjarnan - Fram 4:0
Breiðablik - Stjarnan 1:1 (14. umferð)
KA - HK 1:1
Víkingur R. - ÍBV 6:0
Keflavík - FH 2:3
KR - Valur 0:4

Tryggvi Hrafn Haraldsson er orðinn næstmarkahæstur í deildinni með níu mörk. Ljósmynd/Kristín Hallgrímsdóttir

Markahæstir í deildinni:

10 Stefán Ingi Sigurðarson, Breiðabliki
9 Tryggvi Hrafn Haraldsson, Val
8 Adam Ægir Pálsson, Val
8 Nikolaj Hansen, Víkingi
7 Birnir Snær Ingason, Víkingi
7 Fred Saraiva, Fram
7 Emil Atlason, Stjörnunni
7 Gísli Eyjólfsson, Breiðabliki
6 Aron Jóhannsson, Val
6 Benedikt Daríus Garðarsson, Fylki
6 Guðmundur Magnússon, Fram
6 Ísak Andri Sigurgeirsson, Stjörnunni
6 Kjartan Henry Finnbogason, FH
6 Úlfur Ágúst Björnsson, FH
6 Örvar Eggertsson, HK
5 Danijel Dejan Djuric, Víkingi
5 Eggert Aron Guðmundsson, Stjörnunni
5 Óskar Borgþórsson, Fylki