Landsliðskonan unga Amanda Andradóttir náði merkilegum áfanga á miðvikudagskvöldið þegar hún skoraði mark Vals í jafntefli gegn Stjörnunni, 1:1, í Bestu deild kvenna í fótbolta.
Amanda hefur með þessu marki, sem var stórglæsilegt, skorað í efstu deildum fjögurra Norðurlanda, Danmerkur, Noregs, Svíþjóðar og Íslands, og náð því aðeins 19 ára gömul.
Amanda skoraði fyrst eitt mark í átta leikjum fyrir Nordsjælland í Danmörku, síðan 4 mörk í 15 leikjum fyrir Vålerenga í Noregi og svo 2 mörk í 25 leikjum fyrir Kristianstad í Svíþjóð. Markið fyrir Val kom í hennar þriðja leik í efstu deild hér á landi.
Sædís Rún Heiðarsdóttir skoraði líka mjög fallegt mark fyrir Stjörnuna í sama leik. Sædís skoraði ekki í fyrstu 60 leikjum sínum í efstu deild, en hefur nú skorað fyrir Garðabæjarliðið í þremur leikjum í röð.
Fanndís Friðriksdóttir úr Val lék sinn 280. deildaleik á ferlinum, heima og erlendis, gegn Stjörnunni, og er tólfta íslenska knattspyrnukonan frá upphafi sem nær þeim leikjafjölda.
Selfoss lék sinn tíunda leik í deildinni á þessu tímabili gegn Tindastóli án þess að skora mark, þegar liðin gerðu markalaust jafntefli á Sauðárkróki. Selfossliðið hefur aðeins skorað í fimm af fimmtán leikjum sínum í deildinni.
Kínverski framherjinn Linli Tu er orðin næstmarkahæst í deildinni með 7 mörk. Hún skoraði fjögur mörk fyrir Keflavík og hefur nú gert þrjú mörk í fyrstu þremur leikjum sínum með Breiðabliki. Linli skoraði tvívegis þegar Breiðablik vann Þór/KA, 4:2.
Katla Tryggvadóttir varð þriðji Þróttarinn í sögunni til að skora 10 mörk fyrir félagið í efstu deild kvenna þegar hún jafnaði gegn ÍBV í gærkvöld, 1:1. Á undan henni voru Ólöf Sigríður Kristinsdóttir (20) og Stephanie Ribeiro (10).
Bríet Jóhannsdóttir skoraði sitt fyrsta mark í efstu deild þegar hún jafnaði fyrir Þór/KA, 2:2, gegn Breiðabliki á Kópavogsvelli. Þetta var hennar sjötti leikur.
Rachel Avant lék sinn fyrsta leik með FH í deildinni gegn Keflavík í jafnteflisleik liðanna í gærkvöld, 1:1,, sem og 15 ára nýliði, Thelma Karen Pálmadóttir.
Úrslitin í 15. umferð (heitir 13. umferð í leikjaplaninu)
Breiðablik - Þór/KA 4:2
Tindastóll - Selfoss 0:0
Valur - Stjarnan 1:1
Þróttur R. - ÍBV 1:1
Keflavík - FH 1:1
Markahæstar:
13 Bryndís Arna Níelsdóttir, Val
7 Linli Tu, Keflavík/Breiðabliki
6 Agla María Albertsdóttir, Breiðabliki
6 Katrín Ásbjörnsdóttir, Breiðabliki
6 Sandra María Jessen, Þór/KA
5 Andrea Rut Bjarnadóttir, Breiðabliki
5 Birta Georgsdóttir, Breiðabliki
5 Freyja Karín Þorvarðardóttir, Þrótti
5 Katla Tryggvadóttir, Þrótti
5 Tanya Boychuk, Þrótti
4 Holly O'Neill, ÍBV
4 Melissa Garcia, Tindastóli
4 Olga Sevcova, ÍBV
4 Shaina Ashouri, FH
4 Sierra Marie Lelii, Þrótti
4 Taylor Ziemer, Breiðabliki
4 Þórdís Elva Ágústsdóttir, Val
Næstu leikir:
15.8. ÍBV - Keflavík
15.8. Þór/KA - Valur
15.8. Þróttur R. - Tindastóll
15.8. Selfoss - FH
16.8. Stjarnan - Breiðablik