Íþróttir | Íslenski fótboltinn | mbl | 21.9.2023 | 7:00

23. umferð: Stór áfangi annan leikinn í röð og met jafnað

Hallgrímur Mar Steingrímsson á fullri ferð í leiknum gegn Keflavík í gær. Ljósmynd/Kristín Hallgrímsdóttir

Hallgrímur Mar Steingrímsson, kantmaður KA-manna, náði stórum áfanga annan leikinn í röð með Akureyrarliðinu í Bestu deild karla í fótbolta.

Hallgrímur skoraði tvö marka KA í gær þegar liðið vann Keflavík, 4:2, í 23. umferð deildarinnar á Akureyri. Fyrra markið hans var það 50. sem hann skorar fyrir KA í efstu deild og hann er sá fyrsti í sögu félagsins til að ná þeim áfanga.

Frétt af mbl.is

22. umferð: Sló 40 ára gamalt met, 15 ára einn sá yngsti

Eftir seinna markið hefur Hallgrímur skorað 55 mörk í deildinni en fjögur þeirra gerði hann fyrir Víking í Reykjavík árið 2015.

Markamet HK í deildinni er ýmist slegið eða jafnað þessa dagana enda eru tveir núverandi leikmenn liðsins, Arnþór Ari Atlason og Atli Arnarson, þeir markahæstu hjá Kópavogsfélaginu í efstu deild. Arnþór skoraði sitt 14. mark fyrir HK þegar liðið gerði jafntefli, 1:1, við Fram á mánudagskvöldið, og jafnaði því metið sem Atli setti á dögunum.

Arnþór Ari Atlason fagnar markinu gegn Fram. mbl.is/Eggert Jóhannesson

Víkingar slógu markametið í deildinni í gærkvöld þegar þeir gerðu jafntefli, 2:2, við KR. Þeir hafa nú skorað 67 mörk í 23 leikjum en á síðasta tímabili slógu Víkingur og Breiðablik metið sameiginlega með því að skora 66 mörk hvort í 27 leikjum. Fyrra metið áttu Skagamenn, 62 mörk í aðeins 18 leikjum árið 1993.

Tómas Bent Magnússon úr ÍBV skoraði sitt fyrsta mark í efstu deild á sunnudaginn þegar Eyjamenn gerðu jafntefli, 2:2, við Fylki. Þetta var hans 32. leikur í deildinni.

Ísak Daði Ívarsson úr Keflavík skoraði sitt fyrsta mark í efstu deild í gær þegar lið hans tapaði 4:2 fyrir KA. Þetta var sjötti leikur hans í deildinni.

Þóroddur Víkingsson úr Fylki skoraði sitt fyrsta mark í deildinni, í sínum þriðja leik, þegar hann jafnaði gegn ÍBV, 2:2, undir lok leiksins.

Þengill Orrason úr Fram lék sinn fyrsta leik í efstu deild þegar lið hans gerði jafntefli við HK, 1:1, á mánudagskvöldið, og spilaði allar 90 mínúturnar í vörninni.

Úrslitin í 23. umferð:
Breiðablik - FH 0:2
Fylkir - ÍBV 2:2
Valur - Stjarnan 2:0
HK - Fram 1:1
KA - Keflavík 4:2
Víkingur R. - KR 2:2

Markahæstir í deildinni:

14 Emil Atlason, Stjörnunni
11 Birnir Snær Ingason, Víkingi
11 Nikolaj Hansen, Víkingi
11 Tryggvi Hrafn Haraldsson, Val
10 Stefán Ingi Sigurðarson, Breiðabliki
10 Danijel Dejan Djuric, Víkingi
9 Kjartan Henry Finnbogason, FH
8 Adam Ægir Pálsson, Val
8 Fred Saraiva, Fram
7 Aron Jóhannsson, Val
7 Gísli Eyjólfsson, Breiðabliki
7 Patrick Pedersen, Val
7 Örvar Eggertsson, HK
6 Arnþór Ari Atlason, HK
6 Ásgeir Sigurgeirsson, KA
6 Benedikt Daríus Garðarsson, Fylki
6 Davíð Snær Jóhannsson, FH
6 Eggert Aron Guðmundsson, Stjörnunni
6 Guðmundur Magnússon, Fram
6 Gyrðir Hrafn Guðbrandsson, FH
6 Ísak Andri Sigurgeirsson, Stjörnunni
6 Úlfur Ágúst Björnsson, FH