Annað hvort stöngin út eða stöngin inn

„Fyrsti leikurinn í Bestu og við kláruðum þetta með stæl,“ sagði Sigdís Eva Bárðardóttir leikmaður Víkings í samtali við mbl.is eftir að hún og liðsfélagar hennar báru sigurorð á Stjörnunni í 1. umferð Bestu deildarinnar, 2:1.

„Mér fannst við spila vel. Við héldum okkar plani og gerðum það sem við ætluðum að gera og uppskárum sigur,“ bætti við Sigdís við.

Frétt af mbl.is

Sterkur útisigur í fyrsta leik nýliðanna

Hún skoraði fyrsta mark leiksins með fallegu skoti utan teigs í stöngina og inn, hennar fyrsta mark í efstu deild. Sigdís skoraði ekki ósvipað mark á móti Val í Meistarakeppni KSÍ í síðustu viku.

„Ég gerði það sem ég geri, fór inn og skaut. Á einhvern hátt var þetta svipað og á móti Val en þá var ég nær miðjunni. Þetta var meira úti en þetta var sama uppskriftin. Ég sá að boltinn var að fara í stöngina og það var annað hvort stöngin út eða stöngin inn,“ sagði Sigdís sem er aðeins 17 ára gömul en skoraði 16 mörk í deild og bikar á síðasta tímabili.

Hafdís Bára Höskuldsdóttir skoraði sigurmark Víkings snemma í seinni hálfleik. Eftir það skapaði Stjarnan sér fá færi og Víkingur sigldi sterkum sigri í höfn.

„Við fórum aðeins aftar, þéttum okkur meira og þær komust ekkert í gegn. Það er frábært að vera byrjaðar í Bestu deildinni. Undirbúningstímabilið var hart og erfitt. Við sýndum það í þessum leik að við getum unnið þessi lið,“ sagði Sigdís.

• Blogga um frétt