„Það er erfitt að fá íslenska leikmenn til þess að fara út á land,“ sagði Bára Kristbjörg Rúnarsdóttir, aðstoðarþjálfari U23-ára landsliðs kvenna, í upphitunarþætti Dagmála fyrir Bestu deild kvenna í knattspyrnu þegar rætt var um Keflavík.
Keflavík er spáð 10. sæti deildarinnar og falli í spá íþróttadeildar Árvakurs en liðið hafnaði í áttunda sæti deildarinnar á síðustu leiktíð.
„Ég er búin að reyna það og að sannfæra leikmenn um að keyra upp á Akranes, á Selfoss eða til Keflavíkur er mjög erfitt,“ sagði Bára Kristbjörg.
„Svo eru félögin með mismikið á milli handanna og ef þú nærð ekki að velja nægilega góða útlendinga þá er blóðtakan mjög mikil þegar íslensku leikmennirnir fara annað,“ sagði Bára Kristbjörg meðal annars.